Këshilli i Lartë Gjyqësor vendosi të hënën se gjyqtarët Rexhep Bekteshi, Genti Shala dhe Taulant Banushi, kishin plotësuar kriteret paraprake në garën për një vend në dhomën penale të Gjykatë së Lartë.
Në tre vendime gati identike KLGJ bëri me dije se nuk kishte asnjë pengesë për kandidatët dhe votoi unanimisht që ata të kalonin në procedurën tjetër të verifikimit.
Gara për vendin vakant në Gjykatën e Lartë, në të cilën garojnë tre gjyqtarët, u shpall nga KLGJ në 11 maj të këtij viti dhe kandidati zgjidhet mes gjyqtarëve. Të tre kandidatët kanë kaluar më herët në procesin e rivlerësimit dhe vendimi për ta është i formës së prerë.
Gjykata e Lartë ka aktualisht 16 anëtar nga 19 që parashikohet të ketë. Zëvendësimi i anëtarëve nga KLGJ ka marrë disa vite, ndërsa procedura e ndjekur është kritikuar sidomos sa i përket zgjedhjes së anëtarëve nga jashtë sistemit të cilët nuk i janë nënshtruar një procesi rivlerësimi publik si kolegët e tyre që ishin në pozicione të gjyqtarëve.
