Këshilli i Lartë Gjyqësor miratoi të hënë vendimin për fillimin e punës së Gjykatës së Apelit të Juridiksionit të Përgjithshëm, bazuar në vendimin e qeverisë për hartën e re gjyqësore.
Bazuar në vendimin e miratuar unanimisht nga KLGJ Gjykata e Apelit Tiranë bëhet edhe Gjykata e Apelit të Juridiksionit të Përgjithshëm dhe merr drejtimin e kësaj të fundit deri në zgjedhjen e një kryetari apo një kancelari të ri, ndërsa apelet në Durrës, Gjirokastër, Korçë, Shkodër dhe Vlorë shkrihen dhe i nënshtrohen procesit të ristrukturimit.
“Administrata gjyqësore e gjykatave të apelit Durrës, Gjirokastër, Korçë, Shkodër dhe Vlorë i nënshtrohet procesit të ristrukturimit”, thuhet në vendim. I njëjti vendim është marrë edhe për ndihmësit ligjorë pranë këtyre gjykatave. Ndihmësit ligjorë në Tiranë qëndrojnë në detyrë, ndërsa ato të gjykatave të apelit të rretheve i nënshtrohen ristrukturimit.
KLGJ thotë se apeli i ri do të fillojë të funksionojë në 1 shkurt të vitit që vjen, ndërsa u ka kërkuar gjykatave që të gjitha çështjet e regjistruara deri në fund të janarit 2023 të transferohen përmes sistemit në Gjykatën e Apelit të Juridiksionit të Përgjithshëm dhe rishortohen. Vetëm çështjet për të cilat ka filluar gjykimi do të vijojnë të shqyrtohen nga të njëjtët gjyqtarë.
KLGJ thotë se akti i miratuar “synon përmirësimin e ofrimit të shërbimeve efikase përmes miratimit dhe zbatimit të Hartës së re Gjyqësore”.
“Ky vendim është konceptuar si një vendim kuadër që përcakton tërësinë e parimeve që do të udhëheqin procesin e zbatimit të riorganizimit të kompetencave tokësore të gjykatave të apelit, duke synuar vijimësinë në drejtimin dhe ofrimin e shërbimeve gjyqësore, administrative dhe atyre mbështetëse nga Gjykata e Apelit të Juridiksionit të Përgjithshëm, në datën 1 shkurt 2023”, thuhet në njoftimin e KLGJ-së mbi vendimmarrjen.
Harta e re gjyqësore që fillon të zbatohet në fillim të shkurtit 2023 hasi në kundërshtime të ashpra kryesisht prej Dhomës së Avokatisë. Krijimi i një apeli të vetëm në Tiranë ishte një nga arsyet e kundërshtimit. Megjithë protestën e avokatëve procesi vijoi dhe qeveria miratoi hartën e re, ndërsa KLGJ ka filluar punë për implementimin e saj.
