Gjykata e Posaçme e Apelit për Korrupsionin dhe Krimin e Organizuar caktoi të enjten më 24 nëntor 2022 një masë të dytë sigurie “arresti me burg” ndaj ish-deputetit socialist, Alqi Bllako. Sipas njoftimit të gjykatës, gjyqtari Dhimitër Lara vendosi të ndryshojë vendimin e shkallës së parë dhe të miratojë kërkesën e Prokurorisë së Posaçme, SPAK për masën shtrënguese të sigurisë lidhur me akuzat për inceneratorin e Elbasanit.
Alqi Bllako u vetëdorëzua në polici më 1 prill të këtij viti, pasi Gjykata e Posaçme caktoi më parë masën e “arrestit me burg” pas hetimit për kontratën koncesionare të Fierit. Më 6 tetor, drejtuesja e Gjykatës së Posaçme të Shkallës së Parë, Irena Gjoka e zëvendësoi masën e sigurisë ndaj tij nga “arrest në burg” në “arrest shtëpie” – por më 9 nëntor Bllako u rikthye në burg me vendim të Apelit.
Koordinatorja për mediet pranë SPAK, Xhuljeta Krasta sqaroi për BIRN se masa tjetër e sigurimit “arrest në burg” e caktuar të enjten nga gjyqtari Lara ka të bëjë me procedimin e nisur ndaj Alqi Bllakos për aferën e inceneratorit të Elbasanit.
Së bashku me Bllakon, SPAK ka ngritur akuza edhe ndaj 9 zyrtarëve të tjerë të lidhur me procedurat e koncesionit për inceneratorin e Fierit, përfshi edhe ish-Ministrin e Mjedisit, Lefter Koka i cili gjendet në burg që prej dhjetorit 2021. SPAK njoftoi më 16 nëntor se kishte avancuar hetimet për inceneratorin e Fierit duke siguruar në gjykatë 11 masa sigurie të reja, nga të cilat 10 “arrest në burg” dhe një në “arrest shtëpie”. Por gjashtë prej tyre arritën t’u shpëtojnë prangave dhe janë shpallur në kërkim.
Prokuroria e akuzon Bllakon se ka falsifikuar të dhënat për tokën mbi të cilën është ndërtuar inceneratori i Fierit, duke i ndryshuar kartelën nga “tokë arë” në “tokë truall”, gjë që ka çuar në një rritje të kostos së shpronësimit me 16 milionë lekë. Ish-deputeti i PS-së akuzohet gjithashtu se ka përfituar padrejtësisht me anë të punësimit të babait të tij, Edmond Bllako, pranë kompanisë koncesionare “Integrated Energy BV SPV” të inceneratorit të Tiranës.
Koka dhe Bllako i kanë mohuar akuzat për korrupsion përpara gjykatës.
Qeveria e kryeministrit Edi Rama ka dhënë tre kontrata koncesionare për ndërtimin e incineratorëve në Elbasan, Fier dhe Tiranë, te një grup kompanish të lidhura me njëra-tjetrën, nën pronësinë e personave pa eksperiencë të mëparshme në këtë fushë.
Koncesioni i parë, inceneratori i Elbasanit, u sekuestrua nga prokuroria dhjetorin e kaluar, pak ditë para se kompania t’i transferohej Bashkisë së Elbasanit me përfundimin e kontratës së koncesionit. Më vonë u vendos nën sekuestro preventive edhe kompania e inceneratorit të Fierit, kontrata për të cilën ishte pranë përfundimit.
Lidhur me këto afera korruptive, SPAK ka kërkuar gjithashtu arrestimin e Stela Gugalles, e cila është pronarja e kompanisë “Albtek Energy” si dhe Klodian Zotos, pronar i kompanisë Integrated Technology Services, por këta të fundit nuk janë arrestuar ende nga policia.
Mbi të dyshuarit rëndojnë akuzat e korrupsionit të zyrtarëve të lartë dhe të pastrimit të parave. SPAK ka refuzuar të bëjë të ditur nëse Gugallja dhe Zoto janë shpallur në kërkim ndërkombëtar.
