Një ndeshje e Kupës së Botës ndërmjet Serbisë dhe Zvicrës të premten në Katar ka ngjallur shumë reagime jashtë fushës pasi Federata e Futbollit të Kosovës, FFK, i kërkon FIFA-s të sanksionojë Serbinë për sharje etnike nga pankina dhe tifozët e Serbisë.
Serbia u eliminua nga gara pas humbjes me Zvicrën me rezultatin 2:3 në një ndeshje që u shoqërua me zënka.
Skuadra zvicerane ka disa lojtarë me origjinë shqiptare të Kosovës.
Të dielën, FFK-ja njoftoi se kishte kërkuar nga FIFA që të sanksionojë Federatën e Futbollit të Serbisë, “në mënyrë që thirrjet fashiste të qëndrojnë larg stadiumeve të futbollit njëherë e përgjithmonë”.
FFK-ja i referohej thirrjeve kundër shqiptarëve në tribuna nga tifozët e Serbisë dhe një video që u bë virale të premten, kur trajneri i Serbisë, Dragan Stojkovic, dyshohet se ofendoi shqiptarët.
“Slogane me mesazhe politike dhe sharje raciste ndaj shqiptarëve u dëgjuan pothuajse gjatë gjithë ndeshjes kundër Zvicrës dhe u raportuan në mediat botërore”, tha FFK.
“Është e pakuptueshme dhe absurde urrejtja me të cilën është ushqyer publiku në shtetin tonë fqinj ndër vite kundër shqiptarëve, në vend që të angazhohet për të zgjatur dorën e pajtimit dhe faljes”, shtoi ajo.
Kjo është dosja e dytë që FFK-ja i dërgon FIFA-s në lidhje me Serbinë në më pak se dy javë. Më 25 nëntor, FFK-ja i bëri thirrje organit qeverisës të futbollit botëror që të ndërmarrë veprime lidhur me një pankartë provokuese të fotografuar të enjten në dhomat e zhveshjes së ekipit serb në Katar.
Fotoja thuhet se ishte shkrepur përpara se Serbia të luante me Brazilin të enjten në raundin e parë të Kupës së Botës. Brazili fitoi me rezultatin 2:0.
Në të tregohej një hartë të Kosovës me një flamur serb brenda saj dhe me fjalët: “Nuk ka dorëzim” (“Nema Predaje”) – që shihet si një referencë për serbët në veri të Kosovës që i rezistojnë presionit të qeverisë së Kosovës për të ndryshuar targat e lëshuara nga Serbia për targa të lëshuara nga Kosova.
Gjatë ndeshjes, kapiteni zviceran me origjinë nga Kosova, Granit Xhaka ishte dy herë në qendër të vëmendjes për incidentet në fushë me lojtarët dhe stafin serb.
Pas ndeshjes, ai hoqi fanellën dhe veshi mbrapsht atë të bashkëlojtarit të tij Ardon Jashari. Jashari një emër që ka një rëndësi të madhe për shqiptarët e Kosovës.
Adem Jashari ishte komandant i Ushtrisë Çlirimtare të Kosovës, UÇK.
Ai u vra në mars të vitit 1998 nga policia serbe në një masakër së bashku me rreth 60 anëtarë të familjes së tij, duke përfshirë gra dhe fëmijë, në një përleshje treditore.
Pas ndeshjes, Xhaka tha se gjesti i tij “nuk ka asnjë sfond politik” dhe se ai e veshi fanellën në bazë të një premtimi që i bëri shokut të tij të skuadrës, gjithashtu me origjinë nga Kosova.
Megjithatë, mediat ndërkombëtare kanë raportuar se ai mund të jetë në qendër të një hetimi të FIFA-s për këtë gjest.
Behgjet Pacolli të dielën ofroi të paguante çdo gjobë të mundshme që mund të përballet Xhaka.
“Nëse emri Jashari shqetëson FIFA-n apo botën dhe Granit Xhaka gjobitet për shfaqjen e këtij emri të shenjtë pas ndeshjes, unë personalisht do ta paguaj atë gjobë, në emër të shqiptarëve. Këtë ia kam komunikuar personalisht sot Xhakës”, tha Pacolli.
I pyetur të dielën se pse nuk kishte reaguar ndaj ngjarjeve të së premtes, kryeministri i Shqipërisë, Edi Rama, tha se Zvicra është një shtet tjetër.
“Sepse është kombëtarja e një shteti tjetër. Dhe duke reaguar do të ndizja flakën e një nacionalizmi … dhe nacionalizmi është gjithmonë i rrezikshëm. Nuk është e nevojshme dhe më duket se kushdo që e bën, nuk bën gjënë e duhur”, tha Rama.
Në Kupën e Botës 2018, të mbajtur në Rusi, FIFA gjobiti dy lojtarët zviceranë, Granit Xhaka dhe Xherdan Shaqiri, me 10,000 franga zvicerane (8,600 euro) për festimin e golave të tyre kundër Serbisë me një gjest shqiponje dykrenare, që simbolizon flamurin shqiptar. Zvicra mundi Serbinë me rezultat 2:1.
Xhaka, së bashku me Xherdan Shaqirin që shënoi golin e parë kundër Serbisë të premten, janë të dy shqiptarë etnikë nga Kosova, e cila u shkëput nga Serbia në luftë në vitin 1999 dhe shpalli pavarësinë pothuajse një dekadë më vonë, por nuk njihet nga Serbia.
