Një 31 vjeçar i identifikuar si Gert Shehu, u arrestua nga policia të martën pasi akuzohet se sulmoi me grusht ish-kryeministrin Sali Berisha. “Në lidhje me incidentin e ndodhur në orën 12:25, në tubimin e organizuar ditën e sotme, gjatë të cilit shtetasi G. Sh. goditi me grusht, deputetin S. Berisha, ju bëjmë me dije se: Specialistët për Hetimin e Krimeve të DVP Tiranë po kryejnë veprimet procedurale për shtetasin G. Sh., 31 vjeç, banues në Tiranë, për veprën penale “Goditje për shkak të detyrës”, njoftoi policia.
Policia shtoi se i ndaluari kishte precedentë penalë për drogë dhe dhunë dhe po ashtu se ai kishte probleme mendore.
Incidenti ndodhi ndërsa mbështetësit e opozitës po prisnin në skenën e improvizuar në kryqëzimin pranë ish-hotel Dajtit mbërritjen e ish-kryeministrit Sali Berisha, në protestën e organizuar paralelisht me samitin midis BE-së dhe Ballkanit Perëndimor që po mbahej nën masa të forta sigurie vetëm disa qinda metra më tutje
Berisha u sulmua pasi kishte dalë nga selia e Partisë Demokratike dhe po marshonte sëbashku me mbështetës drejt kryqëzimit pran ish-Hotel Dajtit. Kamerat që ndiqnin lëvizjen e kreut të PD-së fiksuan një të ri veshur me të kuqe që u shkëput nga turma e simpatizantëve dhe qëlloi ish-kryeministrin me grusht nën sy. Menjëherë truprojat dhe mbështetës të Berishës neutralizuan autorin, i cili u godit prej tyre me shqelma dhe grushta dhe më pas iu dorëzua policisë.
Lajmi i sulmit ndaj ish-kryeministrit i shtangu fillimisht pjesëmarrësit në protestë, duke krijuar një ndjejë pështjellimi që u largua kur Berisha i përshëndeti pasi mbërriti në qendër të sheshit. Folësit në protestë e lidhën sulmin menjëherë me kryeministrin Edi Rama. “Grushti ishte ndaj nesh, ndaj lirisë, demokracisë. Ia garantojmë se përgjigjen do ta marrë mbrapsht 100 fish”, tha deputetja Ina Zhupa.
Reagimet
Vetë Berisha pas fjalës së tij i bëri thirrje policisë të lironte sulmuesin, pasi ai ishte i përdorur. Ai kuzoi Edi Ramën dhe ministrin e Brendshëm si organizatorë të sulmit.
Në një konferencë shtypi pas protestës Berisha tha se gjithçka kishte qenë e përgatitur, ndërsa hodhi dyshime mbi një dokument që tregonte gjendjen mendore të sulmuesit. “Fakti që zyra e tij, e kishte gati shkresën për të ua dhënë gazetarëve. Ju e dini se në raste të tilla këta persona përdoren, se një njeri normal nuk pranon kurrë të përdoret. Edi Rama duke dashur që të paraqesë veten duar jashtë e paraqiti veten 100% duar brenda”, tha Berisha. Ish-kryeministri akuzoi edhe zyrtarë të lartë të Ministrisë së Brendshme, por pas akuzës tha se nuk kishte prova.
Pas ngjarjes përmes një deklarate nga zyra e shtypit Rama e dënoi aktin. “Kryeministri i Shqipërisë Edi Rama dënon pa asnjë ekuivok aktin e pajustifikueshëm e të patolerueshëm të dhunës mbi organizatorin dhe udhëheqësin e protestës së sotme!”, thuhet në deklaratë, ndërsa shtohet se autori apo kushdo që përdor dhunën do të përballet me forcën e ligjit.
Akti u dënua edhe nga presidenti Bajram Begaj dhe kryetarja e Kuvendit Lindita Nikolla. “Presidenti Begaj i konsideron këto akte të papranueshme dhe që bien ndesh me parimet e demokracisë dhe zhvillimin e protestave paqësore”, thuhet në deklaratën e shpërndarë nga presidenca.
Ish-presidenti Ilir Meta, i cili po ecte në krah të Berishës si pjesëmarrës në protesë në momentin e sulmit, e cilësoi atë provokim me qëllim për të ndaluar protestën. Partia e Lirisë të cilën ai drejton akuzoi Ramën për agresionin.
Edhe rivalët e Berishës brenda PD-së e dënuan ngjarjen dhe kërkuar zbardhje të menjëhershme të saj. Gazmend Bardhi, një deputet i Partisë Demokratikë që nuk mbështet marrjen e drejtimit të saj nga Berisha, e cilësoi sulmin si “Akt burracak të Edi Ramës”.
Protesta
Incidenti shokoi protestuesit e mbledhur në kryqëzim pas një sërë barrikadash të vendosura nga policia për të mos lejuar afrimin e askujt pranë godinave ku mbahej samiti i BE.
Vetëm shfaqja e Berishës ne skenë duket se qetësoi atmosferën, ndërsa protestuesit brohëritën koret e njohura të mbështetjes për të.
Protesta vijoi me shfaqe, këngë dhe fjalime nga përfaqësues të opozitës qe u kujdesën të theksonin se mikprisnin samitin dhe liderët e BE, por këmbëngulën se Rama nuk ishte njeriu që duhej t’i priste ata.
Vetë Berisha foli gjatë për mbështetjen që PD kishte për BE dhe sulmoi Ramën si njeriun që në fakt kishte deformuar rrugën e vendit drejt Bashkimit Europian.
“Prania e qeveritarëve më të lartë të BE-së është mbështetja më e madhe që vlerat europiane kanë marrë. Ky samit është mbështeje e madhe për shqiptarët”, tha Berisha.
Ai më pas sulmoi kryeministrin që e akuzoi për korrupsion dhe për deformim të rrugës për në BE permes aleancës me presidentin e Serbisë Aleksandër Vuçiç, i cili ishte i vetmi nga të ftuarit që u atakua nga folësit. “Jemi fatkeq që përfaqësohemi në samit me njeriu që duhet të ishte para drejtësisë”, tha Berisha. Protesta u shpërnda paqësisht.
