Në një deklaratë për mediat përpara fillimit të punimeve të samitit BE-Ballkani Perëndimor, Presidentja e Kosovës, Vjosa Osmani, i bërë thirrje vendeve anëtare të pezullojnë bisedimet e anëtarësimit me Serbinë, pas refuzimit të Beogradit për t'i vendosur sanksione Rusisë pas pushtimit të Ukrainës.
“Mesazhi për Serbinë, përderisa nuk vendos sanksione për Rusinë, përderisa nuk e përmbledh dhe nuk vendos sanksione ndaj shteteve të tjera në përputhje me vendimet e Bashkimit Evropian, duhet të jetë suspendimi i bisedimeve të mëtejshme ndërmjet Serbisë dhe Bashkimit Evropian,” tha Osmani.
Të martën në Tiranë mbahet për herë të parë samiti mes BE-së dhe vendeve të Ballkanit Perëndimor me një axhendë dedikuar zgjerimit dhe përballjes me pasojat e agresionit rus kundër Ukrainës.
Deklarata e Osmanit ndjek tensionet e rritura në veri të Kosovës pas dorëheqjes masive të përfaqësuesve serbë nga qeveria, parlamenti i Kosovës dhe institucionet e sigurisë. Samiti gjithashtu vjen pas vendimit të kryeministrit kosovar, Albin Kurti, për zëvëndësimin e ministrit për Komunitete dhe Kthim në Kosovë, i cili u ndoq me reagime të ashpra në Beograd.
Osmani theksoi se tensionet në veri të Kosovës dhe Ballkan po përshkallëzoheshin nga Serbia dhe i bërë thirrje vendeve të Bashkimit Evropian të mos vendosnin një baraspeshë morale mes agresorit dhe viktimës në rajon dhe më gjerë në konfliktin midis Rusisë dhe Ukrainës.
“Kosova është në të drejtën e saj, i mbron qytetarët e saj, lufton për rend dhe ligj në çdo cep të territorit të saj,” tha Osmani, ndërsa theksoi se ky është një parim dhe standard evropian.
Ajo shtoi se çdo individ racional mund ta kuptonte lehtë që tensionet në Kosovë dhe rajon po përshkallëzoheshin nga Serbia dhe i bëri thirrje BE-së t'i dërgonte një mesazh të qartë Beogradit që veprime të tilla i takojnë të shkuarës.
“Sot do të insistoj përpara liderëvë evropian që të mos bëjnë një lloj ekuivalence morale mes agresorit dhe viktimës, sepse një gjë e tillë është gabim historik, edhe në raportet me Ballkanin Perëndimor edhe në raportet mes Rusisë dhe Ukrainës, sepse jep mesazh të keq dhe e inkurajon [Serbinë] qe të vazhdojë të sulmojë dhe të vazhdojë shkaktojë tensione në tërë rajonin,” tha ajo.
“Siç e dini, Serbia nuk shkakton probleme vetëm në Kosovë, por tenton të destabilizojë edhe fqinjë të tjerë, në mënyrë që ta destabilizojë tërë Ballkanin Perendimor, që është edhe interes i Rusisë,” shtoi Osmani.
Presiendentja e Kosovës shtoi se priste mbështetje vëllazërore nga Tirana zyrtare në mbrojtje të interesave të shqiptarëve, si dhe mbështetje në mekanizmat ndërkombëtare dhe vendet që nuk e kanë njohur akoma shtetin e Kosovës.
“Presim mbështetjen më të madhe të mundshme që një vëlla mund t'ia jepte një vëllau tjetër apo një motre,” përfundoi ajo.
