Instituti për Demokraci dhe Ndërmjetësim (IDM) publikoi të enjten Indeksin e Qëndrueshmërisë së Organizatave të Shoqërisë Civile 2021 dhe u vu në dukje se mjedisi ligjor në të cilin punojnë OSHC-të, advokimi dhe imazhi publik patën përkeqësime të lehta krahasuar me vitin paraardhës.
“Mungesa e transparencës dhe përkeqësimi i lirisë së medias kanë ndikuar në përkeqësimin e dimensionit të advokimit”, theksoi Megi Reçi, hulumtuese e projektit nga IDM, duke e paraqitur advokimin me një indeks 3.3.
Rezultatet tregojnë gjithashtu se kufizimet e zgjatura mbi tubimet dhe konsultimet publike formale jo të mjaftueshme janë elementë të tjerë që kanë ndikuar në përkeqësimin e dimensionit të advokimit.
Ky indeks u bazua në të dhënat e pyetësorëve me 42 organizata të shoqërisë civile, dhe u mbështet nga USAID Shqipëri, si edhe nga Byroja për Demokracinë, Konfliktin dhe Asistencën Humanitare dhe Qëndra e Ekselencës për Demokracinë, të Drejtat e Njeriut dhe Qeverisjen.
Shtatë dimensione të qëndrueshmërisë – mjedisi ligjor, kapaciteti organizativ, qëndrueshmëria financiare, advokimi, ofrimi i shërbimeve, imazhi publik, dhe infrastruktura e sektorit – paraqiten në një shkallë nga 1 në 7, ku “1”-shi paraqet qëndrueshmëri të lartë, ndërsa “7”-ta nënkupton mungesë qëndrueshmërie.
Dimension tjetër që ka shënuar përkeqësim është ai i mjedisit ligjor, me indeks 3.8 për vitin 2021.
“Gjatë vitit 2021 qeveria ndërmori disa ndryshime në mjedisin ligjor të OSHC-ve që çuan në përkeqësimin e rezultatit për këtë tregues”, citon raporti mbi indeksin.
“Qeveria miratoi ligjin për Regjistrimin e Organizatave Jofitimprurëse si pjesë e një grupi të gjerë masash kundër pastrimit të parave dhe financimit të terrorizmit”, theksoi Daniel Prroni, hulumtues projekti pranë IDM.
Blerjana Bino, drejtore ekzekutive e Qëndrës Shkencë dhe Inovacion për Zhvillim (SCiDEV) tha se një nismë e tillë gjithashtu ndikon në përkeqësimin e imazhit publik, dimension tjetër i qëndrueshmërisë së OSHC-ve.
“Klasifikimi si me risk i organizatave të shoqërisë civile në masat për parandalimin e pastrimit të parave dhe terrorizmit ka cënuar imazhin publik të tyre”, tha Bino gjatë fjalës së saj.
Dimensioni i imazhit publik për vitin 2021 në fakt u përkeqësua me një rënie 0.1 nga viti 2019, duke u paraqitur me indeksin 3.8 për vitin 2021.
Sidoqoftë, edhe pse dimensioni i imazhi publik pësoi përkeqësim për shkak të masave të marra nga aktorët politik bërës, organizatat e shoqërisë civile janë ndër ato entitete që gëzojnë akoma besimin më të madh tek publiku.
“Sipas sondazhit të IDM-së, Besimi në Qeverisje, publiku i perceptoi OSHC-të si institucioni i katërt më i besueshëm në vend, pas institucioneve fetare, atyre arsimore, dhe forcave të armatosura”, citon raporti.
