Komisioni i Pavarur i Kualifikimit njoftoi të premten vendimin për konfirmim në detyrë për gjykatësin Sokol Pasho të Gjykatës së Tiranës.
Procesi i tij i vetingut u krye nga trupa e përbërë nga Lulzim Hamitaj kryesues, Valbona Sanxhaktari anëtare dhe Genta Tafa Bungo, relatore.
Në seancën dëgjinore të zhvilluar të enjten u vu në dukje se gjyqtarit i ishte kaluar barrë prove në lidhje me një bilanc negativ prej 330 mijë lekë dhe pyetje mbi mosdeklarimin e gjendjeve cash deri në vitin 2010 të përdorura në blerjen e një apartamenti.
Pasho i kundërshdoi dy gjetjet, por në tërësi vlerësoi hetimin si “objektiv dhe të paanshëm”.
Sokol Pasho ka punuar në pozicione drejtuese në Ministrinë e Drejtësisë në vitet 2003-2008 si dhe këshilltar në institucionin e Avokatit të Popullit në vitet 2011-2013. Në vitin 2013, Pasho është rikthyer në Ministrinë e Drejtësisë, ndërsa prej vitit 2016 punon si gjyqtar pranë Gjykatës së Tiranës.
