Komisioni i Pavarur i Kualifikimit zhvilloi të enjten seancën dëgjimore me gjykatësin Sokol Pasho të Gjykatës së Tiranës.
Procesi i tij i vetingut u krye nga trupa e përbërë nga Lulzim Hamitaj kryesues, Valbona Sanxhaktari anëtare dhe Genta Tafa Bungo, relatore.
Në seancë u vu në dukje se gjyqtarit i ishte kaluar barrë prove në lidhje me një bilanc negativ prej 330 mijë lekë dhe pyetje mbi mosdeklarimin e gjendjeve cash deri në vitin 2010 të përdorura në blerjen e një apartamenti.
Pasho i kundërshtoi dy gjetjet, por në tërësi vlerësoi hetimin si “objektiv dhe të paanshëm”.
Sokol Pasho ka punuar në pozicione drejtuese në Ministrinë e Drejtësisë në vitet 2003-2008 si dhe këshilltar në institucionin e Avokatit të Popullit në vitet 2011-2013. Në vitin 2013, Pasho është rikthyer në Ministrinë e Drejtësisë, ndërsa prej vitit 2016 punon si gjyqtar pranë Gjykatës së Tiranës.
Hetimet ndaj Pashos u fokusuan te mungesa e burimeve për një shumë 330 mijë lekë për një apartament të blerë kryesisht me financa nga familja e tij dhe e bashkëshortes. KPK që gjeti të rregullta pjesën më të madhe të burimeve. I vuri në dukje gjyqtarit mungesën e burimeve në këtë shumë.
Pasho kundërshtoi disa aspekte të analizës financiare që sipas tij nëse merreshin parasysh e përgjysmonin shumën. Ai vuri në dukje se shpenzimet për periudhën para vitit 2001 ishin llogaritur me mbi 30 për qind dhe kërkoi që ato të llogariteshin në 22 për qind. Po ashtu kërkoi të shtohej si e ardhur një shumë prej 60 mijë lekësh. Ai po ashtu vuri në dukje se kishte përfituar nga kursi i këmbimit
Pjesa tjetër e barrës së provës kishte të bënte me mosdeklarimin e kursimeve cash deri në vitin 2010 që ndikonin një shumë prej 10 mijë euro përdorur për blerjen e një apartamenti në Golem. Relatorja megjithatë tha se gjyqtari e bashkëshortja kishin pasur të ardhura.
Gjyqtari pranoi mosdeklarimin e kursimeve si gabim, por vuri në dukje se këtë e kishte deklaruar edhe për ILDKPKI që kishte hetuar këtë problem në vitin 2010.
Ai tha se të ardhurat e ligjshme për periudhën në fjalë e tejkalonin shumë herë shumën. Ndërsa vuri në dukje se vetëm ai kishte pasur mbi 9 milion lekë të ardhura dhe me bashkëshorten mbi 13 milion.
Pashos nuk iu gjetën probleme të figurës. Atij iu bënë pyetje mbi dy çështje të profesionalizmit. Një rast kishte të bënte me një prishje vendimi nga apeli, por siç u shpjegua kishte të bënte me një amnisti që kishte falur dënimin që kishte dhënë Pasho, para hyrjes në fuqi të amnistisë. I dyta ishte një vonesë 4 ditore që Pasho e justifikoi me mungesën e prokurorit.
Pasho kërkoi konfirmim në detyrë. Vendimi do njoftohet të premten në orën 9.30.
