Gjykata e shkallës së parë kundër krimit të organizuar dhe korrupsionit përfundoi hetimin gjyqësor dhe dënoi Markun me 13 vite burg për shkelje të neneve 283/a/1; 28/4; 333/a/2 dhe 334/1 të Kodit Penal, ndërsa i dha ulje për shkak të gjykimit të shkurtuar duke e dënuar përfundimisht me 8 vjet e 8 muaj burg, bëri të ditur gjykata në një njoftim për shtyp. Nenet e kodit penal përfshijnë trafikun e drogës dhe pjesëmarrje në organizatë kriminale.
“Pasi u dëgjuan konkluzionet përfundimtare të mbrojtjes së të pandehurit dhe vetë i pandehuri, gjykata deklaroi të mbyllur shqyrtimin gjyqësor të seancës. Gjykata shpalli vendimin përfundimtar duke deklaruar të pandehurin Hekuran Marku fajtor për veprat penale parashikuar nga nenet e sipërcituara duke e dënuar me 13 vjet burgim,” shkruhet në njoftim.
“Bazuar në neni 406/1 të Kodit të Procedurës Penale, për shkak të aplikimit të gjykimit të shkurtuar, të pandehurit Hekuran Marku i ulet masa e dënimit me 1/3 e dënimit dhe përfundimisht dënohet me 8 vjet e 8 muaj burgim,” vijon më tej njoftimi.
Marku ishte një nga dy personat, truproja të ish-ministrit të brendshëm Saimir Tahiri, të cilët akuzohen se organizuan trafikimin e një sasie të madhe marijuane nga Shqipëria për në Itali në dhjetor të vitit 2016. Ata shpëtuan paq në atë kohë kur droga e nisur prej tyre ra në duart e policisë italiane. Gjithsesi, në vitin 2021, dy skafistët e kapur nga policia italiane vendosën të bashkëpunojnë me drejtësinë e vendit fqinj për të dëshmuar përfshirjen e zyrtarëve të niveleve të larta në trafikun e drogës. Sipas dosjes hetimore të parë nga BIRN, skafistët Fiqiret Seferi dhe Fërhat Ajdini dëshmuan se si droga u transportua nga Tepelena për të Vilë Bashtovë në grykëderdhjen e Shkumbinit nën shoqërinë e truprojave para se të nisej për në Itali.
Ish-ministri Saimir Tahiri është aktualisht në burg nën akuzën e abuzimit me detyrën por është shpallur i pafajshëm për akuzën e trafikut ndërkombëtar të drogës. Procesi për truprojën tjetër Agustin Deda vijon.
