Prokuroria e Posaçme Kundër Korrupsionit dhe Krimit të organizuar, SPAK njoftoi të mërkurën më 28 dhjetor 2022 se, në bashkëpunim me oficerët e Policisë Gjyqësore të Drejtorisë së Antiterrorit në Policinë e Shtetit dhe Byronë Kombëtare të Hetimit, kanë përfunduar hetimet dhe dërguar për gjykim çështjen në ngarkim të të pandehurit Ibrahim El Salih(Lekica), i akuzuar për veprën penale “nxitja, thirrja publike dhe propaganda për kryerjen e veprave me qëllime terroriste”.
SPAK e mbështet konkluzinin e tij në shkrimet e publikuara nga Salih në rrjetin social Facebook. “[…]Nga ana e të pandehurit manifestohen thirrje/propagandë që të shtyjë personat lexues/ndjekësit e tij për të përkrahur luftën e shenjtë ‘xhihadin’, është solidarizuar me personat e vrarë në këtë luftë, me legjitimimin e krijimit të të ashtuquajturit shteti islam i Irakut dhe udhëheqësit e tyre, duke u solidarizuar me fitoren e luftëtarëve të shtetit islam të Irakut, ka mbështetur personat e burgosur të cilët kryejnë vepra penale dhe akte terroriste kundër disa shteteve perëndimore, ka përkrahur mobilizimin e fëmijëve në akte të dhunshme, si dhe ka synuar nxitjen dhe ka bërë thirrje publike për kryerjen e veprave penale me qëllime terroriste”, vlerëson SPAK për postimet e kryera nga Salih në Facebook.
Lexo më shumë: Radikalizimi i Ibrahim El Salih; nga nëpunës publik në ‘propagandues’ xhihadi
Ibrahim El Salih, 56-vjeçari nga Kukësi u arrestua më 24 maj nga Drejtoria e Antiterrorit në Poicinë e Shtetit. I lindur në fshatin Shtiqën dhe banues në Kukës, El Salih njihet si besimtar praktikant i fesë islame dhe ish-punonjës i Inspektoriatit të Mbrojtjes së Territorit. Baba i dy fëmijëve të rritur, ai raportohet gjithashtu si aktivist politik dhe mbështetës i opozitës, por nuk është shquar më parë për prirje ekstremiste ose radikale fetare.
Kërkesa e prokurorit të SPAK, Adnan Xholi për caktimin e masës së sigurisë “arrest në burg” ndaj Salih dhe vendimi i mëparshëm për pranimin e kësaj kërkese nga Gjykata e Posaçme e Shkallës së Parë, u rrëzua nga gjyqtari i po kësaj gjykate Engert Pëllumbi, pas ankimit të kryer nga përfaqësuesi ligjor i të pandehurit.
Pëllumbi arsyetoi se “të gjitha postimet e bëra nga personi nën hetim[…], janë opinione të cilat mund të devijojnë dukshëm, si nga mendimi i përgjithshëm i komunitetit lidhur me këto probleme ashtu dhe nga doktrina zyrtare e fesë së përqafuar prej tij, por që gjithësesi meritojnë të mbrohen nën dritën e lirisë së shprehjes”. Sipas gjyqtarit Pëllumbi, këto postime janë një formë me të cilën Lekica synon të kontribuojë në debatin publik që lidhet me gjendjen e luftës dhe problemet që lidhen me vendet e botës islame, por se nuk i kalojnë kufijtë e lirisë së shprehjes dhe nuk përbëjnë cënim të vlerave të mbrojtura nga Kushtetuta jonë.
Vendimarrja e Pëllumbit për lirimin e menjëhershëm të Lekicës, u gjet e drejtë edhe nga Gjykata e Posaçme e Apelit. Përfaqësuesi ligjor i Ibrahim El Salih, avokati Ferid Muça pohoi atëherë për BIRN se postimet dhe qëndrimet e të përfaqësuarit prej tij ishin në kuadrin e lirisë së ndërgjegjes dhe lirisë së fesë. Ai e cilësoi vendimarrjen për lirimin e Salih të bazuar edhe në jurispudencën e Gjykatës Europiane për të Drejtat e Njeriut.
SPAK kreu rekurs ndaj këtij vendimi që solli lirimin e menjëhershëm të Salih. Koordinatorja për marrdhëniet me mediet pranë SPAK, Xhuljeta Krasta, sqaroi për BIRN të mërkurën se Gjykata e Lartë ka pranuar rekursin e Prokurorisë së Posaçme dhe ka ndryshuar masën e sigurisë për Salih, duke ricaktuar “arrest në burg”. SPAK sqaroi se Ibrahim El Salih (Lekica), aktualisht gjendet në paraburgim.
