Projekti i kundërshtuar i “amnistisë fiskale” vazhdon të jetë një ndër objektivat kryesorë të qeverisë shqiptare për vitin 2023, pavarësisht shqetësimeve të Bashkimit Europian se ky projekt mund t’i hapë rrugën pastrimit të parave të krimit dhe korrupsionit.
“Ky ligj është në objektivat e vitit 2023,” tha ministri i Drejtësisë, Ulsi Manja, në një konferencë për shtyp të mërkurën.
Manja pranoi se projekti i hedhur për konsultim publik para disa muajsh, ishte ende në diskutim për shkak të qëndrimeve të Bashkimit Europian.
“Në dhjetor ishte një ekspert që na është vënë në dispozicion nga BE, i cili ka marrë kontaktet me të gjitha institucionet dhe do të përpilojë një raport,” shtoi ministri.
Manja tha gjithashtu se kjo ekspertizë bëhet për të parë nëse ligji i mbyll të gjitha shtigjet për pastrimin e mundshëm të parave.
Edhe ministri i Brendshëm, Bledi Çuçi e mbrojti projektin, ndërsa shtoi se qeveria garanton se asnjë kategori e botës së krimit dhe korrupsionit nuk do të përfitonte nga amnistia.
Sipas tij, bëhet fjalë për “para që janë fituar me djersë nga shqiptarët që kanë punuar në emigracion në të gjitha format e mundshme, me djersën e ballit”.
Që nga momenti që qeveria “Rama” riktheu projektin e amnistisë pasi ishte tërhequr nga një ide e ngjashme në vitin 2020, përfaqësues të vendeve të BE-së dhe isntitucione të tjera ndërkombëtare janë shprehur kundër saj.
Në shtator, disa ambasadorë të vendeve të BE-së, SHBA-së dhe Britanisë organizuar një takim konsultativ me përfaqësues të qeverisë për këtë çështje. Zyra e delegacionit të BE-së ka bërë të ditur qëndrimin kundër draftit ligjor të qeverisë duke kërkuar rishikimin e tij.
“Bashkimi Evropian ka shqetësime serioze për draftin aktual të ligjit për amnisti fiskale. Ne do të vazhdojmë konsultimet me strukturat përkatëse të qeverisë për të rishikuar këtë legjislacion”- tha delegacioni pas takimit konsultativ.
Projekti i qeverisë parashikon që përkundrejt një tatimi nga 5 deri në 10% të pasurisë së vënë përmes kontrabandës apo evazionit fiskal, shtetasit shqiptarë apo të huajt me rezidencë fiskale në Shqipëri do të kenë mundësinë të deklarojnë deri në 2 milionë euro për familje dhe t’i shpëtojnë përgjithmonë përgjegjësisë penale apo administrative për krimet e kryera, përfshirë evazionin fiskal, mashtrimin me TVSH-në apo kontrabandën me mallrat e akcizës.
Opozita e ka kundërshtuar fort këtë projekt, ndërsa qeverisë i duhen disa vota nga kampi opozitar për ta kaluar në Kuvend.
