Anëtarët e rinj të Këshillit të Emërimeve në Drejtësi, KED u mblodhën të hënën më 16 janar, duke e kryer kostituimin e këtij këshilli të zgjedhur me short nga Presidenti i Republikës në fundvitin e kaluar, për të mundësuar ushtrimin e funksionit përgjatë 2023-it.
Anëtarët e rinj të KED janë Altin Binaj dhe Fiona Papajorgji të Gjykatës Kushtetuese; Sandër Simoni nga Gjykata e Lartë; Arqile Koca nga Prokuroria e Përgjithshme; nga gjykatat e Apelit janë përzgjedhur Fuat Vjerdha dhe Engert Pëllumbi; Arta Marku dhe Gjon Fusha nga prokuroritë e Apelit; si dhe Enerjeta Shehaj (Denaj) nga gjykatat Administrative. Në cilësinë e anëtarëve zëvendësues janë zgjedhur sipas të njëjtës procedurë, Vitore Tusha nga Gjykata Kushtetuese; Albana Boksi nga Gjykata e Lartë; Alma Muça nga Prokuroria e Përgjithshme; Genti Shala nga gjykatat e Apelit dhe Moisi Duda nga prokuroritë e Apelit; ndërsa nga gjykatat Administrative është zgjedhur Elda Vrioni. Mbledhja është thirrur nga kryetari i KED, Sandër Simoni.
Gjykata Kushtetuese u plotësua të hënën më 16 janar me anëtarin e fundit të zgjedhur nga Gjykata e Lartë dhe për rrjedhojë, në situatën aktuale, veprimtaria e KED që është i fokusuar në plotësimin e vendeve vakante në këtë gjykatë dhe Inspektorin e Lartë të Drejtësisë, nuk do të ketë të bëjë me përzgjedhjen e gjyqtarëve kandidatë nëse nuk do të ketë vakanca të paparashikuara.
Në njoftimin e Gjykatës së Lartë sqarohet se gjatë vitit 2023, KED do ta përqëndrojë aktivitetin e tij për të kryer një analize të plotë të të gjithë procesit të funksionimit të Këshillit; në aktet normative të deritasnishme; si dhe në miratimin e akteve nënligjore normative të nevojshme për funksionimin. Po ashtu, është dakordësuar për të rishikuar bazën normative në funksion të verifikimit, pikëzimit dhe renditjes së kandidatëve për në Gjykatën Kushtetuese dhe si Inspektor i Lartë i Drejtësisë.
