Gjykata Kushteteuse publikoi të hënën vendimin për dy ankesat e opozitës për papajtueshmërinë e mandatit të deputetes Olta Xhaçka.
Me shumicë votash kjo gjykatë ka vendosur shfuqizimin e dy vendimeve të Kuvendit që ishin miratuar me votat e mazhorancës socialiste për të bllokuar dërgimin në këtë gjykatë të mocionit për papajtueshmëri të mandatit.
Në njoftimin zyrtar bëhet e ditur se GJK vendosi : “Shfuqizimin e vendimeve nr. 83, datë 17.11.2022 “Për mosmiratimin e raportit të pakicës parlamentare në Këshillin për Rregulloren, Mandatet dhe Imunitetin, me objekt konstatimin e pavlefshmërisë dhe mbarimit të mandatit të deputetes Olta Xhaçka” dhe nr. 84, datë 17.11.2022 “Për miratimin e raportit të shumicës parlamentare në Këshillin për Rregulloren, Mandatet dhe Imunitetin, me objekt konstatimin e pavlefshmërisë dhe mbarimit të mandatit të deputetes Olta Xhaçka” të Kuvendit të Shqipërisë, si të papajtueshme me Kushtetutën e Republikës së Shqipërisë”.
Ndërsa për kërkesën e 1/5 së deputetëve që lidhet me konstatimin e papajtueshmërisë në ushtrimin e mandatit të deputetes Olta Xhaçka, gjykata shprehet se “gjykimi i çështjes duhet të pushohet, pasi për këtë kërkim do të duhet të shprehet më parë Kuvendi i Republikës së Shqipërisë”.
Kolegji i gjyqtarëve të Gjykatës Kushtetuese dëgjoi të mërkurën përreth 8 orë në dy seanca të ndara pretendimet e palëve lidhur me mandatin e deputetit për ministren e Jashtme, Olta Xhaçka, pasi bashkëshorti i saj, Artan Gaçi u shpall “investitor strategjik” nga qeveria.
Në gjykatë ishin paraqitur dy kërkesa nga deputetët e opozitës. Në seancën e parë u paraqit kërkesa e 1/10 së deputetëve të Kuvendit, e cila kishte dy objekte; zgjidhjen e konfliktit të kompetencave mes Kuvendit dhe deputetëve dhe deklarimin si antikushtetues të vendimeve të Kuvendit për mosdërgimin në Gjykatën Kushtetuese të interpretimit të papajtueshmërisë së mandatit të deputetes socialiste.
Padia e dytë e firmosur nga 28 deputetë të tjerë të opozitës kishte dy objekte; shpalljen antikushtetues të vendimeve të Kuvendit si dhe kërkesën për shqyrtim në themel të çështjes së papajtueshmërisë së mandatit të Xhaçkës.
Ministrja Xhaçka u mbrojt nëpërmjet avokatit Genci Çifligu, i cili në parashtrimet mbrojtëse kërkoi që kërkesat e deputetëve opozitarë të rrëzoheshin për shkelje të afateve ligjore dhe këmbënguli që vetë deputetja nuk ka kryer asnjë veprim në shkelje të Kushtetutës.
Po ashtu, ai pretendoi se ajo dhe bashkëshorti nuk kanë pasur përfitime financiare nga statusi i “investitorit strategjik”.
Por ai pranoi se Xhaçka ishte në dijeni të konfliktit të interesit në momentin kur Këshilli i Ministrave mori vendimin për t’i dhënë të drejtën e përdorimit të brigjeve të detit për familjarët e saj, duke sjellë si provë një shkresë ku Xhaçka i kërkonte kryeministrit Edi Rama për të mos marrë pjesë në mbledhje.
