Monitorimi i kryer nga KQZ, që përfshinte periudhën 13 janar – 23 janar ka nxjerrë problematikat lidhur me zbatimin e një neni të posaçëm të Kodit Zgjedhor, që synon të ndalojë partitë dhe kandidatët që të përdorin fondet dhe administratën publike për të bërë fushatë zgjedhore.
Institucionet publike, qendrore dhe vendore, si dhe agjencitë dhe/ose ndërmarrjet shtetërore, janë të detyruara të raportojnë në KQZ të gjitha veprimtaritë me karakter publik që planifikojnë të zhvillojnë në periudhën 4 muaj para datës së zgjedhjeve deri ditën e zgjedhjeve. Sipas një rregulloreje të KQZ-së, raportimi duhet bërë 5 ditë para zhvillimit të aktivitetit dhe KQZ vendos nëse lejohet apo ndalohet zhvillimi i tij.
Sipas raportit të vlerësimit, që u prezantua në mbledhjen e Komisionerit Shtetëror të Zgjedhjeve, Bashkia e Tiranës mban numrin më të madh të aktiviteteve të raportuara në shkelje të afatit me 18 raste, e ndjekur nga bashkia Durrës me 9 raste.
Kryetari i Bashkisë së Tiranës, Erion Veliaj, i cili pritet të rikandidojë për një mandat të tretë, ka zhvilluar disa aktivitete në shkollat e kryeqytetit për inaugurimin e tyre. Në listë janë dhe disa ministri si ajo e Arsimit, Ministri i Shtetit per Marrëdhëniet me Parlamentin apo ajo e Mjedisit.
Komisioneri Shtetëror i Zgjedhjeve Ilirian Celibashi, i kërkoi administratës së KQZ-së që të nisë procedimin administrativ për të gjithë institucionet duke i vënë në dijeni për shkeljet, që t’u jepet mundësi për të parashtruar pretendimet e tyre.
Sipas rregullores së KQZ, në rast se nuk respektohet ky afat veprimtaria do të ndalohet nga KQZ dhe po ashtu do të ndalohet publikimi në faqen elektronike zyrtare të institucionit apo në rrjetet sociale zyrtare të tij.
Në listën e veprimtarive të ndaluara do të konsiderohen veprimtari politike zgjedhore; “promovimi i investimeve me pjesëmarrjen e elektoratit e përfaqësuesve të partisë politike; pjesëmarrja e punonjësve të administratës brenda orarit zyrtar të punës në këtë lloj veprimtarie; promovimi i projekteve të ndryshme në investime, shërbime, për të cilat fondet janë planifikuar pas datës 13 Janar dhe jashtë programit vjetor buxhetor të miratuar në fillim të vitit…”.
Mes veprimtarive të ndaluara janë gjithashtu edhe shpërndarja publike e lejeve të legalizimit dhe/ose çdo titulli pronësie në periudhën e përcaktuar në këtë kujtesë; zhvillimi i veprimtarive me karakter politik/zgjedhor në selitë dhe oborret e shkollave, në spitale e të tilla të ngjashme.
Raporti i vlerësimit nga KQZ vuri në dukje gjithashtu se shumë institucione nuk kishin arritur ta përdornin sistemin për të raportuar, për shkak të kufizimeve të sigurisë kibernetike të vetë institucioneve.