Familjarë e të afërm të aksidentuarve si dhe banorë të lagjes Belebej në Elbasan bllokuan të dielën për dy orë unazën e qytetit në shenjë proteste, pas një aksidenti në 23 janar që i mori jetën Fiori Sulës, 20-vjeç, i cili po kalonte mbi rrugë.
Rreth 3 mijë banorë të zonës përdorin një nënkalim hekurudhor dhe më pas kalojnë Unazën për tu lidhur me qytetin, por kapërcimi ka rezultuar shpesh me aksidente. Në dy vjet dy të rinj kanë humbur jetën aty, ndërsa janë përplasur nga makina. Banorët thonë se ajo pjesë e rrugës është bërë shkak edhe për dhjetëra të lënduar, por autoritetet nuk kanë marrë asnjë masë.
Dhimitër Gjika, një ish specialist në policinë e shtetit shprehet se çështja ka zgjidhje nëse institucionet kanë vullnetin për ta zgjidhur, por sheh se kjo ka munguar. “Ata të ARRSH erdhën nga Tirana dhe e mbyllën rrugën këtu. Është sikur të vijë dikush e të mbyllë derën e shtëpisë ndërkohë që shteti duhet të gjejë zgjidhje dhe jo të mbyllë derën të mos dalësh”, thotë Gjika.
Ai tha se për banorët në zonë më e mira e mundshme do ishte ndërtimi i një nënkalimi.
Kryetari i Bashkisë Gledian Llatja pranoi se shqetësimi i banorëve është i drejtë dhe është një çështje që është diskutuar vazhdimisht. “Banorët janë informuar pasi unë i kam takuar disa herë dhe po shkojmë drejt një zgjidhjeje”, tha kryebahkiaku. Ai këmbënguli se po ndërtohej një nënkalim në zonë dhe se banorët e lagjes do lidheshin përmes tij. Por këmbënguli se protesta u instrumentalizua politikisht.
Por banorët thonë se nuk kanë asnjë angazhim politik. Marjan Zhushi tha se nënkalimi ishte kërkesa e tyre e parë dhe e fundit në çdo stinë zgjedhjesh. “Kjo rrugë është 100 vjeçare. Ka qenë një plan që do bëhej një nënkalim. Lagja sa herë që janë bërë zgjedhje këtë kërkon e asgjë tjetër”, tha ai. “Nuk na hyn në punë politika por zgjidhja për banorët që nuk ka ardhur deri tani nga askush”, shtoi Zhushi.
Eksperienca e rrezikshme në këtë rrugë është e përditshme dhe vendosja një vit më parë e barrierave nuk e ka zbutur problemin.
Një nënë e re me fëmijë tregon se gati u përfshi në një aksident aty vetëm dy ditë më parë. “Isha duke kaluar pikërisht këtu dy ditë më parë. Ka sinjalistikë që nuk lejohet parakalimi, ka vija të bardha dhe një mjet i tonazhit më jep përparësi ndërkohë që një mjet tjetër e parakaloi dhe gati më rrezikoi mua dhe fëmijën nëse kamioni nuk do më kishte sinjalizuar. Këtu është e tmerrshme. Ne jemi të izoluar”, thotë ajo.
Një tjetër banor thotë se për zgjidhjen e këtij problemi ka pasur premtime të vazhdueshme, p[or jo ndonjë punë konkrete. Bllokimi i rrugës shkaktoi probleme në qarkullimin rrugor ndërkohë që policia monitoroi nga afër protestën.
