Kryetarja e Kuvendit, Lindita Nikolla njoftoi se Kryeministri kishte deleguar minstren e shtetit, Elisa Spiropali që të përgjigjej pyetjeve të deputetëve në emër të tij, gjë që u kundërshtua nga opozita.
“Kam kërkuar interpelancë me kryeministrin për takimet e tij private dhe jo me hijen e tij”- tha Gazmend Bardhi, një prej firmëtarëve të kërkesës. Duhet të jetë vetë Rama, sipas Bardhit, “që të japë llogari se si me veprime kriminale ka korruptuar zyrtarë të lartë në FBI”.
“Kjo është aferë personale, por nëse edhe ju keni takime apo lidhje me McGonigal jepni sqarime”- iu drejtua ai Spiropalit.
Edhe pse nuk u lejua të përgjigjej për pyetjet e ngritura në interpelancë Spiropali tha në replikë se opozita kishte ngritur një “kështjellë gënjeshtrash”.
Në kërkesën e tyre deputetët pretendonin se në përmbajtje të akt-padisë ndaj ish-zyrtarit amerikan, ai akuzohet se ka marrë para nga një mik i Ramës dhe informacione nga zyra e tij që të hapë një hetim në SHBA për lobuesin e Partisë Demokratike.
Ata kishin ngritur 14 pyetje për Ramën ku i kërkonin të sqaronte pozicionin e tij në takimet me ish-zyrtarin e FBI, interesat e tij të biznesit në Shqipëri dhe lidhjet me personat e tjerë të përfshirë në akt-akuzë dhe veprimet e kryera nga ish-agjenti për llogari të Ramës.
Deputetët opozitarë e quajtën “tradhëtar” dhe “të korruptuar” duke e akuzuar se ka tentuar të eleminojë opozitën nëpërmjet korruptimit të një zyrtari të lartë amerikan.
Seanca plenare u tensionua pasi opozita bllokoi foltoren duke kërkuar që të mos vijohej me rendin e ditës pa ardhur kryeministri për t’u përgjigjur për lidhjen me dosjen “McGonigal”.
Vetë Rama preferoi të përgjigjej në Tëitter për atë që po ndodhte në Kuvend.
Ai e quajti kërkesën e opozitës abuzim me lirinë e fjalës dhe akuzoi atë se po mapipulonte publikun me shpifje ekstreme me një çështje, që sipas tij, “s’ka asnjë lloj lidhje me ne këtu”.
“Kush i ka dy fije mend e kupton se ç’është e tërë kjo histeri vetëgjyqësie politike e mediatike,mbi një gjyq në Amerikë për një zyrtar të FBI të cilin drejtësia e nongratave këtu pretendon se është korruptuar nga unë, ndërkohë që drejtësia amerikane s’ka asnjë akuzë a pretendim”- shkruan Rama.
Pavarësisht këmbënguljes së opozitës për të ndërprerë seancën deri në ardhjen e kryeministrit, mazhoranca socialiste ia doli të miratojë ligjet në rendin e ditës pa debat, një metodë që u ndoq dhe në një seancë të mëparshme.
Po ashtu, një kërkesë për ngritjen e një komisioni hetimor parlamentar për lidhjet e Ramës me çështjen “McGonigal” është dorëzuar në Kuvend të enjten, e firmosur nga 42 deputetë të Partisë Demokratike.
Opozita kërkon hetim me objekt ligjshmërinë e takimeve të kryeministrit me ish-zyrtarin e FBI-së dhe verifikimin e “nxitjes, ndikimin, porositjen, përdorimin, përfshirjen përmes premtimit dhe ofrimit të favoreve, rryshfetit apo pasurive publike ndaj agjentit special të FBI-së, Charles McGonigal dhe ose agjentë të tjerë të përfshirë për përfitime politike të kryeministrit Edi Rama dhe goditjen apo dëmtimin politik të opozitës shqiptare”.
Por mazhoranca u pozicionua menjëherë kundër. Kryetari i grupit socialist, Taulant Balla u tha mediave se nuk do të ketë komision hetimor derisa të bëhen ndryshimet në ligjin që rregullon ngritjen e këtyre komisioneve.
*Shkrimi u pëditësua me informacionin se deputetët e Partisë Demokratike kanë kërkuar ngritjen e një komisioni hetimor parlamentar.
