Celibashi emëroi anëtarët e propozuar nga partitë politike “Partia e Lirisë”, “Partia Socialiste e Shqipërisë” dhe “Partia Socialdemokrate e Shqipërisë”, për zgjedhjet e qeverisjes vendore të 14 majit.
Ai tha se është në proces verifikimi ligjshmëria e përfaqësimit të PD-së në KQZ.
“Kemi dy lista, një nga Noka në cilësinë e sekretarit të përgjithshëm të PD dhe tjetra nga Sefa që është përfaqësuesi ligjor i PD në KQZ”- tha Celibashi duke shtuar se “do duhet të konsultojmë, maksimumi deri më datën 7 mars mbi legjitimitetin e personit që do duhet të përfaqësojë interesat e PD, më së pari në procesin e regjistrimit si subjekt zgjedhor në KQZ”.
Por ai i cilësoi të plotësuara strukturat e menaxhimit të procesit zgjedhor dhe me 3 anëtarë. “KZAZ-të do të konstituohen se do fillojnë të punojnë. Është kuorumi”.
Sipas komisionerit anëtarët e PD-së do të emërohen në një moment tjetër të përshtatshëm e lidhur dhe me regjistrimin e kësaj partie në zgjedhje.
Ai theksoi se në momentin që do të vendoset për këtë do të jetë një vendimmarrje e thjeshtë dhe e bazuar në ligj.
Të dyja grupimet në PD pretendojnë se kanë të drejtën ligjore për të regjistruar komisionerë në zgjedhje, ndërkohë që ligjshmëria e statutit, logos dhe institucioneve partiake pret gjykimin në Apel.
Sipas Kodit Zgjedhor, e drejta për të propozuar komisionerë sipas Kodit Zgjedhor u takon dy partive kryesore nga mazhoranca dhe dy partive kryesore nga opozita, ndërsa kryesimi i KZAZ-ve ndahet me short mes Partisë Socialiste dhe Partisë Demokratike.
Sipas një vendimi të mëparshëm të KQZ-së “në zgjedhjet e datës 14 maj 2023 dy anëtarë në çdo KZAZ propozohen nga Partia Socialiste e Shqipërisë; një anëtar nga Partia Social Demokrate; dy anëtarë nga Partia Demokratike e Shqipërisë dhe një anëtar në çdo KZAZ do të propozohet nga Partia e Lirisë”.
