Policia e Durrësit dhe agjencitë e tjera ligjzbatuese bllokuan në det të hënën një anije me naftë që dyshohet se theu embargon ndaj Rusisë dhe që do të kontrabandohej më tej në tregun vendas.
Operacioni policor i koduar “Embargo” solli bllokimin e anijes çisternë me flamur liberian (Republika e Liberisë, Afrika Perëndimore) dhe të ekipit të saj prej 22 personash. “Anija ishte nisur nga Azerbajxhani dhe pretendohet se më pas është ngarkuar me naftë në Portin Kallamata, Greqi, nga një anije tjetër, në një sasi prej 22.500 tonë lëndë djegëse naftë”, shpjegoi policia në njoftimin për median.
Por kjo alibi nuk i ka bindur autoritetet shqiptare, të cilat dyshojnë se nafta e kishte origjinën nga Rusia, që është vendosur në embargo dhe ishte e kontrabanduar sipas saj, pasi nuk disponohej dokumentacioni i rregullt.
Ky është një rast i përsëritur muajt e fundit në ujërat e Durrësit, teksa autoritetet përmes bashkëpunimit me agjencitë ligjzbatuese të huaja mundën të ndalonin anije të tjera që sillnin naftë nga Libia dhe motopeshkatore shqiptare që lehtësonin procesin e futjes në vend të naftës kontrabandë.
BIRN përllogariti se në katër operacione policore të mëparshme dhe të sotmin, janë sekuestruar 24 mijë e 800 tonë naftë që dyshohet kontrabandë, me origjinë nga Libia dhe Rusia.
Një muaj më parë, më 14 janar policia kufitare arrestoi 13 persona, mes të cilëve 10 marinarë të huaj dhe 3 shqiptarë, të akuzuar se tentuan të kalonin 62 mijë litra naftë kontrabandë me origjinë nga Libia.
Këto operacione nisën të ekspozonin fenomenin me ndalesën e parë, më 23 korrik kur policia finalizoi operacionin e parë të quajtur “Diesel”, gjatë të cilit u ndalua në det një motopeshkatore në të cilën ishin kamufluar në ambiente të përshtatura 80.000 litra naftë që synohej të kontrabandohej.
Më tej më 7 shtator në një tjetër operacion të koduar “Diesel 2”, policia ndaloi gjatë lundrimit një motopeshkatore në të cilën gjeti rreth 25.000 litra naftë pa dokumentacion, që dyshohet se do të kontrabandohej në tregun vendas dhe arrestoi 2 vëllezër nga Kavaja, 43 vjeçarin me iniciale Sh. C. dhe 41 vjeçarin me iniciale R. C.
Ndërsa më 13 shtator 2022 roja bregdetare në Durrës bllokoi anijen cisternë “Queen Majeda” dhe arrestoi katër anëtarë të ekuipazhit të saj, të dyshuar se kishin futur në Shqipëri 2275 ton naftë kontrabandë dhe ishte nisur nga Porti i Benghazit në Libi.