Blogerja ruse, Svetlana Timofeeva i ka kërkuar autoriteteve shqiptare përmes avokatit Isuf Shehu që t’i japin statusin e azilantes politike, duke pretenduar se Rusia e përndjek për shkak të qëndrimeve të saj kundër luftës në Ukrainë.
Timofeeva mbahet në qeli me akuza të spiunazhit nga prokuroria e Elbasanit, pasi u ndalua së bashku me 2 persona të tjerë në afërsi të ish-Uzinës Mekanike të Gramshit. Ajo është shpallur në kërkim edhe nga Rusia me akuza të ngjashme.
Prokuroria ruse i ka kërkuar Shqipërisë ekstradimin, një proces që po shqyrtohet ndarazi në gjykatën e Elbasanit. Ministria e Drejtësisë i dha dritë jeshile nisjes së procedurës pavarësisht dëshmive për shkelje të të drejtave të njeriut nga Rusia.
33 vjeçarja e kundërshton akuzën. Në kërkesën për azil vihet në dukje se ajo ka mbajtur qëndrime kundër luftës dhe më 24 shkurt 2022, ditën e fillimit të agresionit rus mbi Ukrainë, Timofeeva shkroi për 250 mijë ndjekësit e saj në Instagram se mbështeste ukrainasit.
“Ky nuk është një operacion special çlirimi, kjo është lufta e një njeriu kundër vëllezërve tanë dhe një krim ndaj njerëzve tanë,” shkroi ajo dhe shtoi se ata që mbështesnin luftën duhej të largoheshin nga faqja e saj. “Është gjithmonë e më e vështirë të besosh atë që po ndodh: Lufta nuk mund të quhet luftë, të vrarë nuk tregohen, vdekjet fshihen,” shkroi ajo disa ditë pas fillimit të luftës.
Nisur nga këto postime, mbrojtësit e Timofeevas besojnë se ka arsye që ajo mund të persekutohet. “Për Svetlana Timofeeva ka arsye te mendohet se do t’u nënshtrohet persekutimeve ose diskriminimeve,” thuhet në kërkesën për azil.
Në kërkesë, avokatët thotë se autoritetet ruse po përdornin një procedim penal të vjetër dhe se e filluan ndjekjen penale vetëm pasi u njohën me qëndrimet e Timofeeva kundër luftës. “Kthimi i kësaj shtetaseje në Rusi do të ishte në kundërshtim me ndalimin e torturës dhe trajtimit çnjerëzor dhe poshtërues”, thuhet në kërkesë.
Svetlana Timofeeva 33 vjeç u arrestua më 20 gusht së bashku me Mikahil Zorin, 23 vjeç dhe ukrainasin Fedir Alpatov, 24 vjeç, pas një incidenti të ndodhur brenda rrethimit të ish-uzinës së armëve në Gramsh.
Zorin kundërshtoi dy ushtarakët që tentuan ta ndalonin dhe përdori spray me piper kundër tyre.
Tre të arrestuarit njihen si blogerë dhe janë pjesë e një subkulture të quajtur “Urban Explorer” apo “Urbex”; të apasionuar për të vizituar dhe fotografuar godina të braktisura, përfshi objekte ushtarake të “Luftës së Ftohtë”.
Megjithatë, prokuroria shqiptare i akuzon ata për spiunazh dhe pretendon se treshja kishte ardhur në Shqipëri për të mbledhur informata ushtarake dhe strategjike të sigurisë kombëtare – dyshime të pranuara deri më tani nga gjykatat që zgjatën masën e sigurimit ndaj tyre.
