Prokuroria e Posaçme kundër Korrupsionit dhe Krimit të Organizuar, SPAK njoftoi të martën më 21 mars vendimin e dhënë nga gjykata respektive për dënimin e Jetmir Kastratit (alias Sokol Krasniqi,) i akuzuar për trafik droge në Danimarkë dhe grup të strukturuar kriminal e pastrim parash në Shqipëri, vepra penale të kryera në bashkëpunim.
Në njoftim thuhet se Gjykata e Posaçme e Shkallës së Parë, ka pranuar më 20 mars kërkesën e paraqitur nga SPAK në konkluzionet përfundimtare për dënimin e Kastratit me 13 vjet e 6 muaj burgim dhe në aplikim të gjykimit të shkurtuar, dënimin e tij përfundimtar me 9 vjet heqje lirie.
Hetimi ndaj Kastratit filloi me kërkesë të autoriteteve daneze dhe u fokusua fillimisht në drejtim të evidentimit të pasurisë që zotëronin anëtarët e grupit kriminal ku bënte pjesë dhe 44-vjeçari nga Shkodra. Në kuadër të këtij hetimi, në qershor të vitit 2019 u ndaluan 42 persona në të gjithë vendet ku ishte shtrirë grupi strukturar kriminal, si dhe u sekuestruan 40 kg kokainë në Danimarkë e Hollandë; 600 mijë euro; armë zjarri; granata dhe disa automjete.
Në Shqipëri u ngrit akuzë ndaj 55-vjeçarit Astrit Beqiri, pronari i një pularie dhe shumë pronave në Shkodër, që dyshohej se përmes këtyre aktiviteteve pastronte paratë e fituara nga kunati Jetmir Kastrati prej trafikut të drogës. Edhe ai u ndalua në Shqipëri qershor të 2019-ës.
Sipas autoriteteve daneze, organizata e përbërë kryesisht nga shqiptarë, ishte përgjegjëse për trafikimin në kohë të së paku 1650 kilogramëve kokainë dhe heroinë. Sipas skemës së zbardhur nga autoritetet e Danimarkës, Norvegjisë dhe Shqipërisë, fitimet e trafikut dërgoheshin në qytetin e Tetovës në Maqedoninë e Veriut përmes një linje të transportit të udhëtarëve me autobuz të quajtur “Alba Trans”, para se të transportoheshin për në Shqipëri nga shtetasi Dhimitër Shkodrani, i vendosur gjithashtu nën akuzë.
Beqiri dhe Shkodrani u dënuan në mars të vitit 2021 për grup të strukturuar kriminal dhe pastrim parash, në bashkëpunim – përkatësisht me 7 vjet e 4 muaj dhe 6 vjet e 8 muaj heqje lirie.
