Një mekanik humbi jetën pas një aksidenti në punë në Kurbin. Viktima u identifikua nga policia si Albert Mamli, 45-vjeç, ndërsa ngjarja u raportua se ndodhi rreth orës 17:00 të së hënës pranë një servisi në fshatin Laç të Kurbinit.
Policia bëri me dije se 45-vjeçari ka qenë duke punuar në një mjet kamion, i cili e ka zënë poshtë duke i shkaktuar vdekje.
Mamli ishte punëtor në servisin ku ndodhi ngjarja dhe policia tha se ngriti një grup hetimor për zbardhjen e shkaqeve dhe rrethanave të ngjarjes.
Gjithashtu edhe Inspektorati Shtetëror i Punës tha se do të do të nisë verifikimet në lidhje me rastin, për të parë nëse janë zbatuar rregullat e sigurisë në punë. Ky është aksidenti i dytë në pune me pasojë vdekjen që ndodh brenda pak muajsh në Qarkun e Lezhës në sektorin e mekanikës. Në muajin janar një gomist humbi jetën në fshatin Spiten, teksa po riparonte gomën e një kamioni.
BIRN ka gjetur në shkrime të mëparshme, se aksidentet në punë mbetet të nën raportuara në Shqipëri ndërsa edhe kur raportohen në shumicën e rasteve faji u lihet viktimave.
Të dhënat e procesverbaleve të Inspektoratit të Punës të analizuara nga BIRN treguan se në 2/3 e aksidenteve në punë të regjistruara gjatë vitit 2022, nuk u morën sanksione ndaj kompanive, duke ia ngarkuar përgjegjësitë punëmarrësit. Sektorët më problematikë sipas statistikave mbeten minierat, prodhimi dhe ndërtimi.
