Pala e Berishës përfaqësuar nga avokati Ledio Nuraj pretendoi gjatë shqyrtimit se regjistrimi i palës kundërshtare duhej të pezullohej deri në vendimmarrjen e Kolegjit Zgjedhor për këtë çështje.
Nuraj i kërkoi KAS-it “pezullimin e regjistrimit të subjektit “Partia Demokratike” me nënkryetar Enkelejd Alibeaj në cilësinë e kryetarit të komanduar të Partisë, për zgjedhjet për organet e qeverisjes vendore të 14 majit 2023, deri kur Kolegji Zgjedhor të jetë shprehur me vendim përfundimtar për ankimimin e subjektit “Partia Demokratike e Shqipërisë” e përfaqësuar nga Kryetari Sali Berisha”.
Gjatë seancës, anëtarët e KAS-it i fokusuan pyetjet e tyre nëse vendimi i Celibashit, i cili kishte zbatuar një vendim të KAS-it për regjistrimin e Alibeajt, ishte bazuar në Kodin e Procedurës Administrative apo Kodin Zgjedhor.
Sekretari i përgjithshëm i KQZ-së, Ylli Merkaj, e cilësoi vendimin e KAS-it një akt administrativ dhe kësisoj të zbatueshëm për komisionerin në mënyrë të menjëhershme. Ai tha se nuk ka raste në praktikën e punës që komisioneri të ketë pritur Kolegjin Zgjedhor për akte të kësaj natyre.
Por pala ankimuese pretendoi se komisioneri ka shkelur Kushtetutën dhe Kodin Zgjedhor, pasi nuk ka pritur vendimin e Kolegjit Zgjedhor, si hallka e fundit vendimmarrëse në procesin zgjedhor. Nuraj tha se vendimi i Celibashit ishte një “paragjykim” ndaj subjektit politik që ai përfaqësonte.
Beteja e fundit ligjore e dy grupimeve kundërshtare për përfaqësimin ligjor të Partisë Demokratike është në Kolegjin Zgjedhor, i cili ka njoftuar seancën gjyqësore në datën 27 mars.
