Pragu i pranverës për mjedisorët nuk përbën vetëm një lajm të mirë për lulëzimin e natyrës, por gjithashtu për mbërritjen e një prej specieve të shpendëve në zhdukje, siç është edhe Kali i Qyqes.
“Erdhi i madhi… erdhi! E kam këtu mbi kokë!” citon Shoqata Ornitologjike Shqiptare AOS fjalët e një prej banorëve të komunitetit pranë brigjeve të Vjosës, duke iu referuar ardhjes së Kalit të Qyqes në territorin e vendit tonë edhe për këtë vit.
“Në vendin tonë popullata e Kalit të Qyqes/Vjosës përbëhet prej gjashtë cifteve dhe dy individëve të vetëm”, thekson Shoqata e Ornitologëve Shqiptarë AOS.
Kali i Qyqes, ose sic njihet ndryshe me emrin “Vjosa/AOOS”, njihet si një prej shpendëve të rrezikuar për zhdukje, dhe përfshihet në listën e kuqe të IUCN, njëkohësisht mbrohet nga konventa ndërkombëtare si ato të Bernës dhe të Bonit.
Përgjatë shtegtimit, Kali i Qyqes përshkon shtatë mijë kilometra nga Afrika drejt Shqipërisë dhe në kthim.
Shoqatat e mjedisorëve janë të angazhuar me mbrojtjen e kësaj specie si edhe kujdesen për procesin e riprodhimit dhe folezimit të tyre, në mënyrë që ky shpend i rrallë të vijojë jetesën e tij i pa kërcënuar.
Sipas ekspertëve mjedisorë, disa prej rreziqeve kryesore që i kanosen këtij shpendi vijnë nga vetë dora e njeriut.
“Rreziqet kryesore janë helmet e hedhura në natyrë, elektroshoku dhe përplasja me infrastrukturën energjitike, ngacmimet prej njerëzve dhe dëmtimi I habitatit të territoreve folezuses”, shkruajnë ekspertët e AOS në Shqipëri.
Ekspertët dhe aktivistët e AOS i bëjnë thirrje dashamirësve të shpendëve dhe të natyrës t’iu bashkohen në terren për mbrojten dhe vazhdimësinë jo vetëm të Kalit të Qyqes, por përgjithësisht jetës së egër në Shqipëri.
