Një tender i Bashkisë së Tiranës për blerjen e lëndës djegëse për ngrohje në objektet arsimore është bërë shkak për kanosjen dhe kërcënimin e pronarit të një kompanie private pjesmarrëse në tender, deklaroi policia e Elbasanit të hënën.
Sipas njoftimit për shtyp, tre persona kanë përfunduar në pranga dhe një i katërt është shpallur në kërkim për veprën penale të “shtrëngimit me anë të kanosjes ose dhunës për dhënien e pasurisë”, e kryer në bashkëpunim.
Policia e Elbasanit deklaroi se pas një hetimi proaktiv 1-mujor kishte arrestuar shtetasit me inicialet E.B, 37 vjeç, A.A, 27 vjeç si dhe Sh.A, 62 vjeç si dhe kishte shpallur në kërkim shtetasin L.K, 38 vjeç.
“Këta shtetas, në bashkëpunim me njëri-tjetrin kanë shtrënguar me anë të kanosjes shtetasin E.M, administrator i një biznesi me qendër në Cërrik, duke i kërkuar që të tërhiqej nga një procedurë konkurrimi e fituar në Bashkinë e Tiranës…,” thuhet në njoftimin për shtyp.
“Shtetasi E.M nuk ka pranuar të tërhiqet dhe këta e kanë kërcënuar se do të vrisnin atë dhe familjen e tij,” shtohet në njoftim.
Operacioni i koduar “Tenderi” është zhvilluar në bashkëpunim me Prokurorinë e Elbasanit dhe Forcën e Posaçme Operacionale të Policisë së Shtetit, gjatë së cilit janë sekuestruar një automjet si dhe tetë aparate celularë. Hetimet e mëtejshme po ndiqen nga Prokuroria e Elbasanit.
