Banorët e zonës së Kaçinarit në Mirditë iu rikthyen protestave të dielën kundër planeve për ndërtimin e disa HEC-ve në zonë. Koncesioni për 5 HEC-et në Kaçinar të Mirditës është dhënë në vitin 2018, por deri tani banorët e 7 fshatrave përmes protestave të vazhdueshme nuk e kanë lejuar kompaninë të nisë punë.
Por të dielën banorët pretenduan se kompania është rikthyer në zonë për të vënë në jetë projektin.
Banorët thonë se ata janë të vendosur në betejën e tyre të cilën e kanë nisur që prej vitit 2019-të, për të mos lejuar ndërtimin e hidrocentraleve, të cilët ata thonë se do thajnë burimet ujore dhe dëmtojnë rëndë mjedisin.
“Kemi dalë edhe herë të tjera por tani po behet më e egër dalja. Po na hoqët ujin, na kanë hequr jetën. Do i vazhdojmë protestat”, thotë Mark Përkola banor i zonës. Banorët kërkojnë të pyeten në lidhje me vendimmarrjen për burimet ujore.
Disa vite më parë banorët e Kaçinarit paditën koncesionarin dhe zyrtarët e bashkisë Mirditë që kishin dhënë lejet në SPAK. Por Prokuroria e Posaçme Kundër Krimit dhe Korrupsionit, pasi regjistroi procedim për veprat penale “Shpërdorim Detyre” dhe “Falsifikim Dokumentesh”, ia kaloi çështjen për hetim Prokurorisë së Lezhës.
Kjo e fundit pas hetimeve doli në konkluzionin se nuk ka element të veprës penale dhe dërgoi çështjen për pushim hetimesh në gjykatë. Por këto përfundime u kundërshtuan nga banorët. Në nëntor 2021 Gjykata e Lezhës ktheu për rihetim dosjen, fati i të cilës mbetet i paqartë.
