Komisioni i Ankesave dhe Sanksioneve vendosi të mërkurën që të lejojë kandidimin e socialistit Qerim Ismailaj për bashkinë Mallakastër, pavarësisht pretendimit të Partisë Demokratike se ai ishte në kushtet e ndalimit pas një dënimi gjykate për falsifikim.
Ismailaj u gjet fajtor për “falsifikim”, pasi nuk kishte deklaruar në formularin e dekriminalizimit një dënim të hershëm të tij në Greqi, ku rezulton i dënuar me tre vite burg për një sherr të dhunshëm të ndodhur në vitin 2000.
Ai u dënua në shkurt 2023 me 6 muaj burg, dënim që për shkak të gjykimit të shkurtuar u ul në 4 muaj dhe më pas u konvertua në 40 orë punë publike.
Përfaqësuesi i PD-së në KQZ, Indrit Sefa, argumentoi se Ismailaj ndodhej në kushtet e ndalimit për kandidim dhe kërkoi shfuqizimin e vendimit të Komisionerit Shtetëror të Zgjedhjeve, Ilirian Celibashi, që e dërgonte rastin për verifikim të thelluar në prokurori.
“Në 2025 mund të kandidojë ky zotëria, pasi të mbarojë 2-vjeçarin e ndalimit që parashikohet në ligj,” tha Sefa.
Sipas Sefës, Ismailaj ishte dënuar për një vepër penale të kryer me dashje direkte dhe nëse do të lejohej kandidimi i tij në zgjedhje do të vihej një predecent i rrezikshëm për zbatimin e ligjit të dekriminalizimit.
“Ligjvënësi jo më kot e ka emërtuar ligjin ‘për garantimin e integritetit të personave që zgjidhen,’” tha ai, duke shtuar se shpallja fajtor për “falsifikim” e bën këtë kandidat pa integritet për t’u zgjedhur.
Përfaqësuesi i PS-së në KQZ, Eridian Salianji kundërshtoi ankimimin e PD-së dhe kërkoi nga KAS që të linte në fuqi vendimin e komisionerit për verifikim të thelluar të kandidatit të kësaj partie.
Duke referuar Kodin Penal, Salianji tha se dënimi “konsiderohet i paqenë” pasi kryhet dënimi alternativ me orë pune, të cilat kandidati i kishte kryer.
Po ashtu, ai argumentoi se ligji ishte bërë me qëllim për të ndaluar dënime që kishin të bënin me krimin e korrupsionin. “Pse kur u bë ligji këtë qëllim kishte, që të ndalonte dikë pse ka harruar të deklarojë një të dhënë në formular?” ngriti ai pyetjen para anëtarëve të KAS-it.
Ismailaj u zgjodh kryetar bashkie në zgjedhjet vendore të vitit 2019 dhe më pas u denoncua nga opozita për fshehje të një dënimi në Greqi në formularin e vetëdeklarimit, i cili rezultoi i vërtetë pas verifikimit të thelluar nga prokuroria. Megjithatë, Ismailaj vazhdoi ta ushtronte funksionin e tij pas një vendimi të KQZ.
