Në pamje të parë, duket se socialistët kanë avantazhe të shumëfishta në zgjedhjet për bashkinë e vogël të Përmetit në jug të vendit, ku 16 mijë votues pritet të zgjedhin kryetarin e ri të bashkisë dhe këshillin bashkiak më 14 maj. Të dhënat e zgjedhjeve të vitit 2021 tregojnë se socialistët fituan në nivel bashkie në masën 55% përkundrejt 39% të votave që shkuan për Partinë Demokratike dhe Lëvizjen Socialiste për Integrim të marra së bashku, ndërsa edhe në zgjedhjet e vitit 2019, socialistët arritën të mobilizonin për veten 4200 vota, një numër më i lartë votash nga sa patën fituar më 2015 dhe nga sa fituan më 2021.
Megjithatë, Përmeti ishte një nga të paktat bashki në jug që zgjodhi një kandidat demokrat në zgjedhjet e vitit 2015, kur Partia Socialiste dhe Lëvizja Socialiste për Integrim derdhën të gjithë pushtetin e vet bashkë në ato zgjedhje. Niko Shupuli, një ish-kryetar komune, arriti të fitojë zgjedhjet në Përmet dhe madje fitoi me rezultat të thellë, 57 me 38%.
Në garën e 14 majit garojnë kryebashkiakja aktuale, Alma Hoxha, e arsimuar në Degën Gjuhë-Letërsi në Fakultetin e Shkencave Shoqërore të Universitetit “Eqerem Çabej”, me Edmond Kominon, i cili ka qenë kryetar i bashkisë së qytetit të Përmetit në periudhën 2007-2011. Alma Hoxha u zgjodh kryetare bashkie në vitin 2019 për Partinë Socialiste. Edmond Komino ka qenë kryetar për Partinë Dekmokratike ndërsa tani garon për koalicionin Bashkë Fitojmë, një koalicion i përbërë nga ish-kryeministrat dhe ish-presidentët Sali Berisha dhe Ilir Meta.
Bashkia e Përmetit përbëhet nga qyteti Përmet dhe ish-komunat Çarçovë, Frashër, Petran dhe Qendër Piskovë. Bashkia shtrihet në një terren malor në të dy krahët e Lumit Vjosa dhe ka një sipërfaqe prej 602 kilometrash katrore.
Ekonomia e zonës përbëhet nga bujqësia e blegtoria ndërsa gjatë viteve të fundit është zhvilluar turizmi i natyrës. Bashkia është e pasur me bukuri natyrore si vendburimi termal i Bënjës, kanionet e Bënjës dhe Lengaricës, Parku Kombëtar i Hotovës apo mali i Dhëmbelit që ngrihet mbi qytetin Përmet si dhe objekte të trashëgimisë kulturore si Shtëpia e vëllezërve Frashëri, Kishat e Leusës, Kosinës, Bualit, Bënjës pasohen nga disa ura tipike me harqe, ndërtime të shek. të XVIII-të si ajo e Katiut apo Bënjës.
