Votuesit e bashkisë së vogël të Libohovës në Shqipërinë e jugut pritet të zgjedhin kryetarin e ri të bashkisë mes kandidatit socialist Leonard Hide dhe kandidatit të koalicionit Bashkë Fitojmë Adil Xhelili. Bashkia, e cila përbëhet nga qyteza e Libohovës dhe njësitë administrative Libohovë Qendër dhe Zagorie, ka një këshill bashkiak prej 15 anëtarësh, për të cilin garojnë shtatë parti, të cilat kanë vendosur në listat e tyre të mbyllura 114 kandidatë. Me një kandidat për këshill për çdo 52 votues, kjo është një nga dhjetë partitë me numrin më të lartë të kandidatëve në raport me votuesit në vend.
Zona është qeverisur nga socialistët që nga viti 2015 ndërsa në vitet 2011-2015, demokratët kontrollonin pushtetin në tre njësitë përbërëse. Gjithsesi, zgjedhjet e vitit 2021 për kuvendin e Shqipërisë sugjerojnë se fitorja nuk është e garantuar për socialistët. Në këto zgjedhje, në nivelin e bashkisë, PS-ja mori vetëm 66 vota më shumë se sa PD dhe LSI të marra bashkë ndërsa partitë e tjera më të vogla kanë qenë historikisht një faktor i rëndësishëm në zonë, duke marrë 208 vota së bashku më 2021. Kjo sugjeron se gara është e ngushtë, por që gjithsesi socialistët kanë avantazhe të konsiderueshme për shkak se kanë pushtetin qendror dhe administratën aktuale të bashkisë, e cila numëron 95 të punësuar. Për një bashki ku në zgjedhje hidhen jo më shumë se 2500 vota dhe ku kandidati fitues pritet të marrë diçka më shumë se sa 1200 vota, të punësuarit e bashkisë duket se përbëjnë faktor përcaktues.
Bashkia shtrihet në një sipërfaqe prej 248 kilometrash katrore, ku pjesa kryesore gjendet përgjatë luginës së Drinos ndërsa ish-komuna Zagorie shtrihet përgjatë një lugine të lartë mes maleve Dhëmbel dhe Lunxhëri.
Si e gjithë zona e Gjirokastrës, banorët e bashkisë Libohovë merren kryesisht me bagëti të imta dhe me produkte blegtorale. Territori i bashkisë është i pasur me objekte të trashëgimisë kulturore historike ndërsa gjatë viteve të fundit është bërë tërheqës për turistët e natyrës dhe të aventurës.
Pjesëmarrja në zgjedhje ka qenë zakonisht më pak se 50%, duke reflektuar shkallën e lartë të emigrimit.
