Bashkia e Këlcyrës në jug të Shqipërisë ka shënuar rënie të vazhdueshme të popullsisë, të votuesve në listat zgjedhore dhe në numër votash, ndërsa është qeverisur që nga viti 2015 nga Klement Ndoni i Partisë Socialiste, i cili më herët ka qenë kryetar i bashkisë së qytetit të Këlcyrës që nga viti 2011.
Këlcyra ka qenë një bashki të cilën socialistët e fituan me shumë vështirësi në vitin 2015, kur ishin në aleancë me Lëvizjen Socialiste për Integrim, kur Ndoni arriti të marrë vetëm 116 vota më shumë se sa kandidati i pavarur Bujar Fezga, i cili u mbështet nga Partia Demokratike, pasi kjo e fundit tërhoqi kandidatin e saj me precedentë penalë si tregues i vullnetit të mirë për dekriminalizimin. Por që nga ajo kohë, numri i votuesve në lista ka rënë për këtë bashki nga gati 9800 në vitin 2015, në 9300 aktualisht. Pjesëmarrja në zgjedhje ka rënë nga gati 5 mijë në vitin 2015, në 3600 votues në zgjedhjet e vitit 2021. Socialistët gjithsesi fituan zgjedhjet parlamentare të vitit 2021 në nivel bashkie duke marrë rreth 200 vota më shumë se sa kundërshtarët e tyre aktualë, koalicioni Bashkë Fitojmë, i përbërë nga mbështetësit e Sali Berishës dhe partia Lëvizja Socialiste për Integrim krahas partive të tjera më të vogla.
Gjithsesi, gara duket se është e hapur për shkak se avantazhi i socialistëve në zgjedhjet e vitit 2021 është më i vogël se sa numri i votave të marra nga partitë e vogla kështu në në përballje për maxhoritar, çdo votë duket se vlen.
Këlcyra është edhe një nga bashkitë ku Partia Demokratike zyrtare e drejtuar nga Enkelejd Alibeaj ka vendosur të garojë me Adriatik Spahiun.
Këlcyra është një qytezë e shtrirë mes maleve Trebeshinë dhe Nemerckë, e cila përshkohet nga ujërat e kthjellëta të Vjosës. Kjo bashki përbëhet nga 4 njësi administrative, të cilat janë: Këlcyrë, Ballaban, Sukë dhe Dishnicë. Bashkia ka nën administrimin e saj një qytet dhe 48 fshatra.
Bashkia e Këlcyrës numëron 175 të punësuar.
