Bashkia e Hasit në veri të Shqipërisë ishte një nga surprizat elektorale, një zonë tradicionalisht e djathtë, e cila votoi kandidatin e koalicionit të majtë të përbërë nga Partia Socialiste dhe Lëvizja Socialiste për Integrim në vitin 2015.
E majta fitoi zgjedhjet me rezultatin 52 me 45%, por fakti është që edhe në zgjedhjet e mëparshme, ato të vitit 2007 dhe 2011, kandidatët e majtë për kryetarë komunash në rrethin Has janë paraqitur mirë përballë demokratëve, duke qeverisur bashkinë e Krumës, e cila është qendra e bashkisë së re Has krijuar pas reformës së vitit 2015.
Situata duket gjithsesi se ka ndryshuar, dhe jo në favor të socialistëve. Ish- kryebashkiaku i tyre Adem Lala u dënua nga Struktura e Posaçme Kundër Korrupsionit dhe Krimit të Organizuar për veprën penale të shpërdorimit të detyrës, në lidhje me privatizimin e një ndërtese shtetërore në Krumë. Ndërsa rezultati zgjedhor i socialistëve në zgjedhjet parlamentare të vitit 2021 ishte katastrofik. Ata morën vetëm 35% të votave në zgjedhjet parlamentare përkundrejt 63% që morën demokratët.
Bashkia e Krumës numëron rreth 17 mijë votues në listat e zgjedhësve, por numri i pjesëmarrësve në zgjedhje ka rënë, nga gati dhjetë mijë në zgjedhjet e vitit 2011, në 8 mijë në zgjedhjet e vitit 2021, duke reflektuar shkallën e lartë të emigrimit. Pjesëmarrja gjithsesi ka qenë e konsiderueshme, 73% në vitin 2007, 50% në vitin 2021.
Në garën e 14 majit garojnë Miftar Dauti për koalicionin “Bashkë Fitojmë” dhe Beqir Mulaj për Partinë Socialiste. Tetëmbëdhjetë parti garojnë me lista të mbyllura për 21 mandatet e këshillit bashkiak të Hasit. Në listat e tyre gjenden 396 emra, ose afërsisht një kandidat për çdo 40 votues.
Bashkia e Hasit ka një sipërfaqe prej 400 kilometrash përgjatë kufirit me Kosovën dhe në të përfshihen zonat administrative Krumë, Fajzë, Gjinaj dhe Golaj. Bujqësia dhe punësimi ditor në qytetet e Kosovës pranë bashkisë së re, si Gjakova dhe Prizreni, përbëjnë burimet kryesore të jetesës, krahas të ardhurave nga emigrimi nga vende të tjera, veçanërisht në Britaninë e Madhe.
Relievi i zonës shtrihet nga rreth 300 metra mbi nivelin e detit deri në malet e larta të Gajrepit, Pashtrikut dhe Maja e Kunorës, të cilat gjenden në lartësitë 1400-1900 metra mbi nivelin e detit.
Hasi gjendet gjithashtu në shtegun turistik malor Theth-Valbonë-Kukës dhe turizmi rural apo malor mund të jetë një perspektivë e mirë ekonomike për këtë zonë.
Hasi njihet si krahinë etnografike me traditë të gjatë zejtare në produktet e leshit të punuara me shije si dhe për zanatçinj bukëpjekës.
Toka bujqësore e disponueshme për banorët e zonës u reduktua ndjeshëm pas ndërtimit të hidrocentralit të Fierzës, i cili përmbyti disa lugina dhe fshatra.
Bashkia e Hasit numëron 232 të punësuar.
