Adriatik Zotkaj u zgjodh kryetar i bashkisë Poliçan për herë të parë në vitin 2004 dhe më pas, më 2007, si përfaqësues i Partisë Bashkimi për të Drejtat e Njeriut. Që nga ajo kohë, ai duket se e ka përmirësuar vazhdimisht rezultatin e vet zgjedhor, ndërsa Partia Socialiste fitoi zgjedhjet në territorin e kësaj bashkie në vitin 2021 me 63% të votave. Zotkaj, kryebashkiaku i dytë më jetëgjatë në Shqipëri pas Gëzim Topçiut të Maliqit, kërkon aktualisht mandatin e tij të gjashtë.
Përballë tij garojnë Florian Qama, një ekspert i teknologjisë së informacionit dhe mësues, i cili kandidon në emër të Partisë Demokratike, dhe Behar Xhaferajt, i cili garon në emër të koalicionit Bashkë Fitojmë.
Bashkia e Poliçanit përbëhet nga 3 njësi administrative, të cilat janë: Poliçan, Tërpan dhe Vërtop. Nga këto, Poliçani është aktualisht pjesë e rrethit Skrapar ndërsa dy njësitë e tjera janë pjesë e rrethit Berat. Të gjitha njësitë janë pjesë e qarkut Berat. Bashkia e re ka nën administrimin e saj një qytet dhe 26 fshatra. Për të parë listën e plotë të qyteteve dhe fshatrave të kësaj bashkie, klikoni këtu.
Bashkia e re e Poliçanit përbëhet nga qyteza ish-industriale e Poliçanit dhe dy komuna të cilat nuk kanë lidhje të drejtpërdrejtë me qytezën pasi kanë qenë më parë pjesë e rrethit Berat. Nga këto, komuna Tërpan, e cila shtrihet në një terren të thyer malor dhe ka një lidhje të tërthortë me Poliçanin, përmes Beratit.
Qyteti i Poliçanit ka qenë një qendër e rëndësishme e industrisë ushtarake dhe e industrisë së materialeve të ndërtimit për shkak të burimeve të mëdha të gurit. Poliçani ka qenë më herët një fshat në varësi të Beratit, i cili u shpall qytet në vitin 1967.
Industria mekanike pushoi së ekzistuari pas viteve 1990 dhe u kufizua në disa raste vetëm në procesin e demontimit të municioneve, gjë që solli papunësi shumë të lartë në qytezë, e cila filloi të depopullohej nga të rinjtë. Shfrytëzimi i rezervave të gurit vijon sot në mënyrë private. Industria e nxjerrjes së gurit dekorativ është në ditët e sotme një resurs i konsiderueshëm ekonomik për zonën.
Numri i votuesve të regjistruar në zonë ka rënë me rreth 1 mijë vetë, nga 14 mijë në 13 mijë, duke reflektuar largimin e të rinjve dhe rënien natyrore të popullsisë. Numri i pjesëmarrësve në zgjedhje ka rënë nga 7800 në 6200 vetë. Pjesa më e madhe e rënies së votuesve ka gërryer nga ana e partive të opozitës.
