Bashkia e Krujës kontrollohet nga Partia Socialiste përmes Artur Bushit, një ish-emigrant që para se të merrte bashkinë e Krujës në vitin 2015, ishte zgjedhur kryekomunar i Thumanës në vitin 2011 për Partinë Socialiste. Përballë tij garon Agron Loka, i cili ka qenë kryetar i degës së Partisë Demokratike në qytezën e Fushë-Krujës, një nga njësitë administrative të bashkisë Krujë.
Kruja numëron 65 mijë votues dhe votat e saj janë të rëndësishme për zgjedhjet parlamentare për shkak se llogariten si pjesë e qarkut Durrës, një qark me një numër të lartë e në rritje deputetësh dhe që përbën një nga zonat kyçe të palëve konkurruese për llogaritë në kapjen e shumicës parlamentare. Banorët e bashkisë së sotme votuan në shumicë dërrmuese për kandidatët e PD-së në zgjedhjet e vitit 2007, ndërsa rezultati u ngushtua në vitin 2011. Socialistët fituan Krujën mes debateve më 2015. Në vitin 2021, ata fituan vetëm 225 vota më shumë se sa partitë e opozitës, PD dhe LSI, të marra sëbashku.
Rezultati i vitit 2021 sugjeron se gara e 14 majit është e hapur.
Numri i votuesve në Krujë është rritur me 10 mijë nga viti 2011, ndërsa numri i pjesëmarrësve në zgjedhje është rritur me më pak se 2 mijë. Shumica e shtesës së votave duket se i ka kaluar socialistëve dhe më pak, kundërshtarëve të tyre.
Pjesëmarrja në zgjedhje është e konsiderueshme. Në vitin 2021 ishte 56%, shumë më e lartë se sa mesatarja kombëtare prej 46%.
Demokratët kanë qeverisur qytetin e Krujës për herë të fundit në periudhën 2007-2015, ndërsa socialistët kanë kontrolluar Fushë-Krujën në vijimësi që pas vitit 2011. Komuna Nikël është kontrolluar nga socialistët me deputetin e tyre aktual Rrahman Rraja që së paku nga viti 2003.
Bashkia e Krujës shtrihet në një zonë prej 339 kilometrash katrore në Shqipërinë qendrore dhe ka terren të përzierë fushor dhe malor. Ajo përfshin njësitë administrative Bubq, Thumanë, Fushë-Krujë dhe Nikël në zonën fushore dhe Krujën e Cudhinë në zonën malore. Kruja dhe Fushë-Kruja janë statusin e qytetit.
Zona ka karakter ekonomik të përzierë, industrial dhe bujqësor, ku vendburimet e gurit gëlqeror përbëjnë bazën e industrisë së prodhimit të çimentos dhe të gëlqeres në vend si dhe shqetësimin kryesor për mjedisin dhe shëndetin për shkak të ndotjes së stërmadhe që kjo industri shkakton. Zona malore e Cudhisë përfshin parkun kombëtar të Qafë-Shtamës.
Qyteti i Krujës me kështjellën mesjetare, tregun e stilit osman, muzeun etnografik dhe muzeun kombëtar “Gjergj Kastrioti Skënderbeu” është ndoshta vendi më i vizituar turistik në Shqipëri ndërsa turizmi ka sjellë edhe ruajtjen e traditës së artizanatit në disa zeje të kufizuara në Pazarin e Krujës.
Të dyja qytetet, Kruja dhe Fushë-Kruja, kanë si burime kryesore punësimi industrinë e veshjeve dhe këpucëve ndërsa qyteti i Fushë-Krujës siguron një pjesë të konsiderueshme të të ardhurave edhe nga fabrika e çimentos.
