Qytetarët e bashkisë Divjakë pritet të votojnë më 14 maj për të zgjedhur kryetarin e ri të bashkisë, mes kandidatit socialist, Josif Gorrea dhe kandidatit të koalicionit Bashkë Fitojmë, Aurel Malko. Të dy kandidatët janë marrë me biznes. Gorrea garon për mandatin e parë, pasi Partia Socialiste vendosi të mos e rikandidojë më kryebashkiakun aktual, Fredi Kokoneshi. Ky i fundit, një ish-ushtarak, aktualisht po mbështet publikisht kandidatin socialist.
Bashkia e Divjakës shtrihet në Ultësirën Perëndimore të Shqipërisë dhe është një nga resurset më të rëndësishme bujqësore të vendit.
Kjo bashki përbëhet nga 5 njësi administrative, të cilat janë: Divjakë, Tërbuf, Grabjan, Gradisht dhe Remas. Të gjitha njësitë administrative janë aktualisht pjesë e rrethit të Lushnjes dhe qarkut Fier. Bashkia e re ka nën administrimin e saj një qytet dhe 36 fshatra. Për të parë listën e plotë të qyteteve dhe fshatrave të kësaj bashkie, klikoni këtu.
Banorët e bashkisë jetojnë falë bujqësisë së zhvilluar dhe tokës që mund të mbillet deri në tre herë në vit, për konsum të brendshëm dhe për eksport, si dhe falë turizmit familjar dhe peshkimit të zhvilluar në bregdetin e parkut Kombëtar Divjakë-Karavasta.
Territori i bashkisë zë 309 kilometra katrore.
Bashkia ka 44 mijë votues me të drejtë vote ndërsa pjesëmarrja në zgjedhje ka rënë nga 55% në vitin 2011 në 47% në vitin 2021, gjë që duket se reflekton një shkallë emigrimi dhe largimi të popullsisë pavarësisht kushteve krahasimisht më të mira ekonomike të bujqve dhe blegtorëve të zonës. Rënia e pjesëmarrjes së opozitës ka gërryër nga të dyja palët, por më shumë nga ana e opozitës. Në zgjedhjet parlamentare të vitit 2021, dy partitë opozitare, PD dhe LSI, morën 42% të votave ndërsa socialistët morën 48%. Partitë e tjera morën 9% të votave.
Bashkia e re e krijuar nga reforma e vitit 2015 përfshin disa ish-komuna të cilat nuk kanë lidhje organike me njëra-tjetrën pasi rrjeti i komunikimit është i ndërtuar drejt qendrës kryesore të zonës, Lushnjës.
