Qytetarët e bashkisë së Shijakut pritet të zgjedhin më 14 maj për kryetar bashkie mes kryetarit aktual të Partisë Socialiste, Elton Arbana, i cili ka qenë më herët zyrtar i IKMT-së dhe tregtar makinash dhe Rezeart Tushës, kandidat i koalicionit Bashkë Fitojmë, i cili nuk ka një jetëshkrim të publikuar online.
Shijaku është një bashki që ka ndryshuar krah. Në zgjedhjet për pushtetin vendor në vitin 2007, kandidatët e Partisë Demokratike fituan 68% të votave, ndërsa në vitin 2011, 59% të votave. Në zgjedhjet e vitit 2015, Adrian Kokomani i Partisë Socialiste fitoi 58% të votave, ndërsa në zgjedhjet parlamentare të vitit 2021, PS fitoi 51% të votave kundrejt 42% që fituan PD dhe LSI bashkë.
Shijaku është një nga bashkitë e vendit ku popullsia me të drejtë vote është rritur me shpejtësi. Në zgjedhjet e 14 majit ka 37 mijë qytetarë në listat e zgjedhësve nga 27 mijë që kishte në zgjedhjet e vitit 2011. Pjesëmarrja në votime nga ana tjetër ka ardhur në rënie. Në zgjedhjet e vitit të kaluar pjesëmarrja ishte vetëm 44% nga 50% më 2015.
Kandidati aktual i Bashkë Fitojmë, Rezeart Tusha ka deklaruar në formularin e dekriminalizimit se është përzënë nga Zvicra kur ka qenë i ri për tejkalim të lejes së qëndrimit, ndërsa është akuzuar nga maxhoranca se arsyeja e dëbimit ka të bëjë me trafikun e drogës. Tusha ka hedhur poshtë akuzat, ndërsa një tentativë për verifikim nga Prokuroria e Përgjithshme nuk ka arritur të vërtetojë as njërin version dhe as tjetrin. Sipas një njoftimi pa datë të prokurorisë [link], autoritetet zvicerane kanë refuzuar të bashkëpunojnë në kuadër të ndihmës së ndërsjelltë juridike për shkak se procesi i dekriminalizimit në Shqipëri nuk konsiderohet hetim në kuadër një procesi penal ndaj subjektit në fjalë.
Shijaku është bërë famëkeq për lidhjet politikë – krim në vitin 2019, kur një hetim mbi trafikun ndërkombëtar të drogës ekspozoi lidhjet e grupeve kriminale me zyrtarë të Partisë Socialiste. Mes të tjerash u zbulua se si elementë të krimit të organizuar patën propozuar për deputet Ilir Ndraxhin, i cili vijon të jetë deputet i Partisë Socialiste, si dhe i patën kërkuar listën e të punësuarve drejtorit të ujësjellësit të qytetit me qëllim që t’i bënin presion të punësuarve për të votuar Partinë Socialiste nën kërcënimin e largimit nga puna.
Bashkia e re përbëhet nga katër njësi administrative të cilat janë Shijaku, Maminasi, Xhafzotaj dhe Gjepalaj. Të gjitha janë pjesë e Rrethit Durrës të Qarkut Durrës. Bashkia e re ka një qytet dhe 25 fshatra. Për të parë listën e plotë të qyteteve dhe fshatrave të kësaj bashkie, klikoni këtu.
Bashkia e re Shijak shtrihet në një zonë fushore dhe kodrinore përgjatë lumit Erzen. Bashkia gjendet në Shqipërinë qendrore dhe ekonomia e saj është me karakter industrial dhe tregtar.
