Zgjedhje 2023, rezultatet Bashkia Shkodër dhe anëtarët e Këshillit Bashkiak (Infografik)

Kandidati i PS Benet Beci fitoi mbi 34 mijë vota ose 60% përkundrejt kandidatit të koalicionit Bashkë Fitojmë Bardh Spahia, i cili mori më pak se 23 mijë vota ose 40%. Zgjedhjet në Shkodër pësuan në këtë mënyrë një përmbysje të madhe historike. Të 34 mijë votat janë rezultati më i mirë zgjedhor që kanë arritur ndonjëherë kandidatët socialistë në territorin e Bashkisë Shkodër dhe kjo duket se ka ardhur falë ndihmës së Partisë Socialdemokrate të Tom Doshit, e cila rezulton e dyta më e madhja në këshill dhe që ka mbështetur publikisht kandidaturën e Becit.

Në zgjedhje në Shkodër më 14 maj morën pjesë vetëm 35% e popullsisë, niveli më i ulët i shënuar në histori. Në krahasim me zgjedhjet e vitit 2021, Beci mori gati 9 mijë vota më shumë nga sa kishin marrë Partia Socialiste dhe Partia Socialdemokrate sëbashku ndërsa Bardh Spahia mori 15 mijë vota më pak nga sa kishin marrë Partia Demokratike dhe Lëvizja Socialiste për Integrim sëbashku.

Në zgjedhjet për Këshillin Bashkiak duket se e djathta është mbajtur disi më mirë se sa në zgjedhjet për kryetar. Partia Socialiste do të ketë grupin më të madh me 18 nga 51 anëtarët ndërsa socialdemokratët do të kenë 12 anëtarë. Bashkë Fitojmë, Partia Demokratike dhe tre parti të tjera që tradicionalisht kanë qenë të djathta, kanë sëbashku 31 anëtarë.