Komisioni i Ankimimeve dhe Sanksioneve (KAS) konstatoi të mërkurën parregullsitë e para të procesit zgjedhor të 14 majit pas rinumërimit të fletët e votimit në 5 kuti për këshillin e bashkisë Pukë, ku u gjetën dhjetra vota fiktive kryesisht në favor të Partisë për Drejtësi, Integrim dhe Unitet.
Pas rinumërimit të një kutie, që i përkiste Qendrës së Votimit 0425/0, u konstatua se 64 vota që i përkisnin subjektit zgjedhor Partia Republikane ishin llogaritur si vota për Partinë për Drejtësi, Integrim dhe Unitet, e cila në fund të rinumërimit doli me zero vota.
Ndërkohë, në QV 0415/00, u gjetën 4 vota shtesë për FRD, 1 votë shtesë për PD, 1 votë shtesë për PSD dhe një votë mangët për ALD.
KAS mori vendim për të rihapur këto kuti pas kërkesave ankimore të Partisë Aleanca Demokristiane e Shqipërisë dhe Partisë Aleanca Progresiste LZHK.
Të dy partitë kundërshtonin vendimin e KZAZ 07 në Bashkinë Pukë, duke kërkuar rinumërimin dhe rivlerësimin e votave të vlefshme dhe të pavlefshme dhe ndryshimin e tabelës përmbledhëse të rezultatit të Këshillit Bashkiak Pukë, sipas rezultatit të rinumërimit.
KAS pranoi provat e depozituara nga pala ankuese, ku u shfaqen pamjet filmike të numërimit të votave, që tregonin në disa raste votat për Partinë Republikane edhe pse në tabelën përfundimtare ky subjekt figuronte me zero vota.
Nga këqyrja e fletëve të votimit rezultuan dhe disa diferenca të vogla me 1-2 vota që u përkisnin subjekteve të tjera zgjedhore.
Në përfundim të shqyrtimit, KAS vendosi korrigjimin e Tabelës Përmbledhëse të Rezultatit për këshillin e bashkisë Pukë, sipas gjetjeve të dala nga këqyja e fletëve të votimit.
PSD e Doshit doli parti e parë në Pukë sa i takon Këshillit Bashkiak, duke marrë 4 këshilltarë, kundrejt 3 këshilltarëve që kanë sëbashku koalicioni opozitar “Bashkë Fitojmë” dhe Partia Socialiste. Partia e Doshit, i sanksionuar nga SHBA për ‘përfshirje në korrupsion madhor’, u rendit e katërta për numrin e votave në këshilla në shkallë vendi, duke e bërë atë me shumë gjasa një nga politikanët më të fuqishëm të vendit.
Gjithshtu, KAS shqyrtoi kërkesën ankimore të Partisë Aleanca Demokristiane e Shqipërisë që kundërshtonte tabelën përmblëdhese të rezultateve për zgjedhjet e Këshillit të Bashkisë Përmet, por vendosi rrëzimin e kërkesës dhe lënien në fuqi të vendimit të KZAZ-së.
*Ky shkrim u amendua për të saktësuar numrin e votave fiktive që dolën pas procesit të rinumërimit. Në versionin e mëparshëm, KQZ njoftoi gabimisht se në njërën prej QV-ve, nga 190 vota të miratuara për PSD u gjetën 118 vota. Në njoftimin e dytë, KQZ deklaron se diferenca është me 1 votë.
