Zgjedhje 2023, rezultatet Bashkia Tiranë dhe anëtarët e Këshillit Bashkiak (Infografik)

Në Bashkinë Tiranë më 14 maj votuan 302 mijë qytetarë, nga të cilët, gati 159 mijë votuan kryebashkiakun Erion Veliaj për një mandat të tretë ndërsa 100 mijë vetë votuan kandidatin e Bashkë Fitojmë Belind Këlliçi. Kandidati i tretë më i votuar ishte Arlind Qori nga Lëvizja Bashkë me gati 14 mijë vota ndërsa Roland Bejko, kandidati i Partisë Demokratike, fitoi pak më shumë se 12 mijë vota. Marko Dajti nga Fronti i Majtë mori 2809 vota ose gati 1% ndërsa Lajla Përnaska nga Partia Drejtësi, Integrim dhe Unitet, mori 2,107 vota ose 0.73%.

Tirana është bashkia ku numri i votuesve është shtuar me 20 mijë vetë në krahasim me vitin 2021 ndërsa mbi 77 mijë qytetarë që patën votuar në zgjedhjet parlamentare, refuzuan të dalin në votime këtë vit. Mbi 34 mijë vetë që patën votuar më 2021 Partinë Socialiste dhe Partinë Socialdemokrate nuk morën pjesë më 14 maj ndërsa nga ana e kandidatëve të opozitës, munguan 46 mijë vota. Votat e kandidatëve “të tjerë” ku përfshihen Qori, Dajti e Përnaska, të krahasuar me partitë e vogla që garuan më 2021 plus votat e pavlefshme, arritën në gati 31 mijë në këto zgjedhje. Në total, 10% e të gjitha votave në Tiranë duket se ishin vota të pavlefshme proteste apo vota për kandidatët e vegjël, kryesisht për Arlind Qorin. Gati 12 mijë, ose 3% e të gjitha votave të hedhura ishin të pavlefshme.

Në zgjedhjet për këshillin bashkiak, Partia Socialiste fitoi 50% të votave ose 34 mandate nga 61 ndenjëset e këshillit. Bashkë Fitojmë mori 23% dhe 15 anëtarë ndërsa Partia Demokratike mori 7% të votave dhe 4 anëtarë. Partia Socialdemokrate mori 4.4% të votave dhe tre anëtarë ndërsa edhe pesë parti të tjera morën nga një anëtar secila.

Këto janë anëtarët e këshillit të Bashkisë Tiranë për mandatin 2023-2027.