Zgjedhje 2023, rezultatet Bashkia Vlorë dhe anëtarët e Këshillit Bashkiak (Infografik)

Kandidati i Partisë Socialiste Ermal Dredha fitoi zgjedhjet e 14 majit në Bashkinë Vlorë me 28 mijë vota. Në fakt, për nga numri i votave, ky është rezultati më i keq i socialistëve për më shumë se një dekadë. Socialistët patën fituar 35 mijë vota në vitin 2021, 29 mijë në zgjedhjet pa garë të vitit 2019 apo 32 mijë në vitin 2015. Duhet të shkosh pas në vitin 2007 për të gjetur një palë zgjedhje në të cilat, kandidatët socialistë për kryebashkiakë apo kryekomunarë, të kenë fituar më pak vota se sa këtë vit, pa marrë parasysh këtu që lista e zgjedhësve në këtë bashki ka qenë atëhere shumë më e shkurtër nga sa është sot.

Megjithatë, për nga rezultati në përqindje, Dredha rezulton më i suksesshmi mes kandidatëve socialistë që kanë qeverisur Vlorën. Ai fitoi gati 71% të votave të vlefshme. Ajo që shpjegon këtë kontradiktë, pra fitore e ulët në numër votash dhe e lartë në përqindje është që pjesëmarrja në tërësi në Bashkinë Vlorë, ishte këtë herë edhe më e ulët se sa zakonisht. Të dielën më 14 maj, vetëm 25% e 168 mijë qytetarëve me të drejtë vote morën pjesë në zgjedhje. Pjesëmarrja ra me gati 20 mijë vetë në krahasim me zgjedhjet e vitit 2021, ku votuesit braktisën në masë Partinë Socialiste, por braktisën krahasimisht më shumë kandidatin e opozitës, Hysni Sharra, i cili garoi për koalicionin Bashkë Fitojmë dhe mori gati 9 mijë vota më pak nga sa kishte fituar Partia Demokratike dhe Lëvizja Socialiste për Integrim sëbashku në zgjedhjet parlamentare të vitit 2021.

Në zgjedhjet për Këshillin Bashkiak, Partia Socialiste mori 33 nga 51 vendet anëtare me 60% të votave të vlefshme ndërsa koalicioni Bashkë Fitojmë mori 9 mandate me 16% të votave. Partia Demokratike mori 3 mandate me 6% ndërsa Partia Drejtësi, Integrim dhe Unitet, mori dy mandate me gati 4% të votave.

Partia Agrare Ambientaliste, Partia Republikane, Partia Demokracia Sociale dhe Aleanca Progresiste L.ZH.K, morën secila nga një mandat.

Më poshtë gjeni listën e anëtarëve të rinj të Këshillit Bashkiak Vlorë.