Në një seancë dëgjimore të martën, Gjykata e Tiranës vendosi që Dritan Goxhaj, një ish-luftëtar i Ushtrisë Çlirimtare të Kosovës nga Shqipëria, mund të ekstradohet në Dhomat e Specializuara në Hagë, tha një zyrtar i gjykatës për BIRN.
Goxhaj u arrestua në korrik nën akuzën e “kanosjes gjatë procedimit penal” dhe “pengimit të zyrtarëve në kryerjen e detyrave zyrtare”.
Ai ka të drejtë ta apelojë vendimin e Gjykatës së Tiranës brenda dhjetë ditëve. Avokati i tij nuk mund të kontaktohej nga BIRN të martën.
Avokati i tij tha për BIRN në gusht se Goxhaj ishte akuzuar për një artikull që ai shkroi për një media ku ekspozonte emrat e disa prej dëshmitarëve të mbrojtur të mundshëm në një gjyq për krime lufte të një ish-guerrili të UÇK-së në Hagë.
Goxhaj u arrestua në Tiranë me një urdhër-arresti të lëshuar nga Dhomat e Specializuara të Kosovës me seli në Hagë, që po gjykon ish-luftëtarë të UÇK-së për krime të kryera gjatë dhe menjëherë pas luftës së viteve 1998-1999.
Ky është rasti i parë në Dhomat e Specializuara të Kosovës ku arrestohet një shqiptar nga Shqipëria.
Mbrojtja e dëshmitarëve ka qenë një shqetësim kyç për Dhomat e Specializuara të Kosovës që nga fillimi dhe ishte një nga arsyet kryesore pse gjykata për krimet e luftës u themelua jashtë Kosovës dhe përbëhet nga personel ndërkombëtar, megjithëse është pjesë e sistemit të drejtësisë së Kosovës.
Gjyqet e mëparshme të ish-guerilasve të UÇK-së si brenda Kosovës ashtu edhe në Gjykatën Penale Ndërkombëtare të OKB-së për ish-Jugosllavinë janë shoqëruar nga kanosje e dëshmitarëve. Në disa raste, edhe pasi ishin zhvendosur, atyre u afroheshin të afërm ose të tjerë duke u përpjekur t’i bindnin të tërhiqnin dëshmitë e tyre fillestare.
Ish-udhëheqësi dhe nënkryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati dhe Nasim Haradinaj, tashmë janë burgosur për pengim të drejtësisë dhe kanosje të dëshmitarëve nga Dhomat e Specializuara.
Ata u ndoqën penalisht pasi morën një sërë dokumentesh ligjore të rrjedhura nga Dhomat e Specializuara, të cilat përmbanin informacione konfidenciale për dëshmitarët e mbrojtur, duke përfshirë emrat dhe informacion personal, më pas mbajtën konferenca për shtyp për të nxitur mediat të publikonin ekstrakte nga dosjet e rrjedhura.
Dhomat e Specializuara të Kosovës po gjykojnë ish-guerilët e UÇK-së për krime duke përfshirë vrasje, torturë dhe ndalime të paligjshme.
Në mesin e atyre që tashmë janë në gjyq janë ish-presidenti i Kosovës, Hashim Thaçi, dhe ish-kryetari i parlamentit, Kadri Veseli, të cilët ishin figura të larta të UÇK-së gjatë kohës së luftës. Të dy janë vetëdeklaruar të pafajshëm për krime lufte dhe krime kundër njerëzimit.
