Prokuroria e Posaçme kundër Korrupsionit dhe Krimit të Organizuar, SPAK njoftoi të mërkurën më 11 tetor sekuestrimin e pasurive të kryera në kuadër të procedimit penal ndaj të shpallurit në kërkim ndërkombëtar për trafik droge e grup të strukturuar kriminal, Gëzim Çela nga Fushë Kuqe, i quajtur dhe si “Baroni i Drogës”; anëtarëve të tjerë të këtij grupi; si dhe dhe të pasurive në emër të personave të lidhur me ta.
Sekuestrimi pasurive është kryer menjëherë pas ndalimit nga Policia e Shtetit të shefit të Komisariatit të Laçit, Dritan Metaj, i akuzuar si pjesëtar i këtij grupi me aktivitet kryesor trafikun e drogës.
Hetimi i SPAK filloi në fund të muajit mars, kur i dyshuari Armando Papa u arrestua në flagrancë me një sasi prej rreth 41.6 kilogramë heroinë.
Në vijim të këtij procedimi janë siguruar informacione se nga pjesëtarët e këtij grupi, me datë 14 Gusht 2023, do trafikohej një sasi e konsiderueshme lënde narkotike e llojit cannabis sativa nga vendi i quajtur Patok-Kurbin me mjete lundruese dhe se do të shkëmbehej në det me kokainë që do të transportohej me një mjet tjetër lundrues i cili drejtohej nga shtetas të huaj. Droga më pas do të trafikohej.
Gjatë operacionit në muajin gusht të koduar me emrin “Flakë në det”, u ndaluan katër shtetas shqiptarë dhe dy ukrahinas, të cilët pasi dogjën një mjet lundrues të llojit velierë, tentuan të largohen me një barkë të vogël shpëtimi.
Në vijim, me kërkesë të SPAK, Gjykata e Posaçme e Shkallës së Parë caktoi masat e sigurisë “Arrest në burg” për veprat penale “Trafikimi i narkotikëve”, kryer në bashkëpunim në kuadër të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata krimianle dhe grupi i strukturuar kriminal”, për shtetasit Gëzim Çelaj, banues në Fushë Kuqe; Arben Dalipaj, banues në Vlorë; Roland Guza, banues në Durrës dhe Dritan Metaj, me detyrë shef i Komisariatit të Policisë Laç, ky i fundit i arrestuar të hënën. Tre të tjerët arritën t'u shpëtojnë prangave dhe janë shpallur në kërkim ndërkombëtar.
Nga hetimi i kyer për pasuri të përfituara nga të ardhurat e aktivitetit kriminal të këtij grupi është kërkuar dhe vendosur sekuestrimi i shoqërisë “Royal Blue” Sh.p.k, e themeluar më datë 26 Tetor 2022 me administratore dhe ortake të vetme me 100% të kuotave shtetasen M.Th. me objekt aktiviteti një Bar Restorant në Laç; katër gomone; katër automjete; si dhe shuma monetare.