Prokuroria e Posaçme Kundër Korrupsionit dhe Krimit të Organizuar, SPAK njoftoi të shtunën konfiskimin e pasurive të shtetasit Erjet Strefi, i shpallur në kërkim nga Interpol Praga – Çeki në vitin 2019, për prodhim dhe tregtim të lëndëve narkotike. Po ashtu, janë konfiskuar edhe pasuritë e personave të lidhur me të.
“Në bashkëpunim me shtetas të tjerë shqiptarë dhe të huaj, anëtarë të një grupi të organizuar kriminal, të cilët vepronin në territorin e Republikës Çeke dhe Mbretërinë e Hollandës, gjatë periudhës Qershor 2016 deri në Shtator 2016, kanë prodhuar dhe tregtuar sasi të konsiderueshme lënde narkotike metamfetaminë”, sqarohet në njoftim.
Me kërkesë të SPAK, gjykata respektive ka vendosur konfiskimin për llogari të shtetit të një vile 2 katëshe në Dhërmi, në kompleksin turistik “Ionian Olea” me sipërfaqe totale ndërtimi 151,8 m² dhe sipërfaqe totale trualli 217,16 m²; dy apartamente në Selitë të Tiranës; dy ngastra tokë arë nga 500 m2 në fshatin Krutje e Poshtme e Lushnjës si dhe një automjet.
Një ditë më parë, të premten, SPAK njoftoi konfiskimin e pasurive të tre shtetasve shqiptarë të përfshirë në krimin e organizuar si dhe të pronave ne emër të personave të lidhur me ta. Po ashtu u njoftua sekuestrimi i pasurive në pronësi të jë shtetasi belg në bregdetin e Sarandës dhe në kryeqytet, pasi akuzohet në vendin e tij si drejtues i një organizate kriminale.
