Ish-kryeministri Sali Berisha është marrë i pandehur për veprën penale të korrupsionit pasiv të zyrtarëve të lartë nga Prokuria e Posaçme, një akuzë që mbart dënim nga 4 deri në 12 vjet burg. Jamarbër Malltezi, bashkëshorti i vajzës së ish-kryeministrit, është akuzuar për veprën penale të pastrimit të parave, një vepër penale që parashikon dënime nga 5 deri në 15 vjet.
Një zyrtar i SPAK konfirmoi për BIRN akuzën ndaj ish-kryeministrit dhe ish-presidentit dhe Malltezit. Malltezi u arrestua nga policia të shtunën pas vendimit të gjykatës për masë sigurie arrest me burg. Për Berishën, gjykata ka vendosur masën e sigurisë detyrim paraqitje dhe ka ndaluar largimin e tij nga vendi. Berisha është zyrtari më i lartë i shtetit shqiptar i akuzuar. Ai pritet të deklarojë qëndrimin e tij më vonë.
Ish-kryeministri konsideroi vendimin për masë sigurie kundër tij të paligjshme për shkak se ai gëzon mandat deputeti dhe për rrjedhojë, nuk mund të përballet me masë sigurie pa leje nga parlamenti. Ai i konsideroi akuzat politike dhe të pavërteta.
Ky është një lajm në zhvillim. Na vizitoni sërish më vonë për më shumë informacion.
Pas botimit të këtij shkrimi, me datë 11 nëntor 2023, Jamarbër Malltezi ka përcjellë nëpërmjet avokatit Klodian Skënderi, një reagim në redaksi, i cili mund të lexohet i plotë duke klikuar këtu.
