Policia e Durrësit arrestoi dy persona për aksidentin e së premtes, ku humbi jetën një 35 vjeçar që po punonte për prerjen e degëve të pemëve në lagjen numër 13 dhe ndodhej në koshin e një vinçi që shërben për punime në lartësi.
Të arrestuarit janë Enrik Mahmutaj, 33 vjeç, me detyrë drejtues teknik i kompanisë dhe 42 vjeçari Blerim Margeshi, i cili kishte detyrën e drejtuesit të vinçit, nga i cili ra viktima.
Dy të arrestuarit dyshohen për veprën penale “Shkelja e rregullave të mbrojtjes në punë”.
“…për këtë ngjarje të ndodhur në lagjen nr. 13, ku humbi jetën punonjësi i një firme që kryen punime për ndërtimet e pedonales në këtë zonë, i cili po priste degët e palmave, pa lejen e organeve kompetente…”, sqaroi Policia e Durrësit përmes një deklarate.
Punëtori 35 vjeçar me iniciale A. L. humbi jetën në mënyrë aksidentale të premten teksa po punonte në zonën e Plazhit, në një ditë me mot me erë të fortë në bregdetin e Durrësit. Çështja po e hetohet nga Prokuroria pranë Gjykatës së Shkallës së Parë të Juridiksionit të Përgjithshëm Durrës.