Prokuroria e Durrësit njoftoi të mërkurën më 22 nëntor sekuestrimin e disa pasurive në pronësi të shtetasit G.S., i cili akuzohet për veprën penale “Pastrimi i produkteve të veprës penale ose veprimtarisë kriminale”. Në njoftim thuhet se sekustrimi është kryer me kërkesë dhe urdhër të Prokurorisë së Shkallës së Parë të Breshias në Itali, Seksioni i Masave Autonome te Parandalimit.
“Kërkesa për ndihmë juridike në lëndën penale, u bë nga autoritetet e drejtësisë së Republikës së Italisë, duke u bazuar në Konventën Evropiane për Ndihmë të Ndërsjelltë Juridike në Çështjet Penale (Ratifikuar nga R. Shqipërisë me ligjin nr.9871, dt. 11.02.2008), si dhe parashikuar sipas kërkesave të nenit 506 të K. Pr. Penale, si dhe nenet 14 dhe 20 të Ligjit nr. 10193, dt. 03.12.2009 ‘Për Mardhëniet Juridiksionale me autoritetet e huaja në çështjet penale'”, sqarohet në njoftim.
Nëpërmjet letërporosisë, Prokuroria e Breshias vëren se në nenin 13 të Konventës së Kombeve të Bashkuara kundër krimit të organizuar transnacional, të nënshkruar gjatë Konferencës së Palermos në dhjetor të vitit 2000, si dhe në nenin 3 të të njëjtës Konventë, parashikon zbatimin për procedurat parandaluese. Bazuar në këto konventa, kjo prokurori ka urdhëruar sekuestrimin e pronave të shtetasit G.S. dhe të personave të lidhur me të, konkretisht të dy apartamenteve me sipërfaqe 48.8 m2 dhe 330 m2; dy sipërfaqe tokë arë me sipërfaqe 12 mijë e 710 m2 dhe 7890 m2; objekt 3-katësh me sipërfaqe ndërtimi 140 m2, ndërtuar në truall 300 m2 dhe objekt me 2 kate, me sipërfaqe ndërtimi 140 m2, ndërtuar në një sipërfaqe trualli 500 m2.