Prokuroria e Posaçme, SPAK njoftoi të shtunën më 25 nëntor përfundimin e hetimeve dhe dërgimin për gjykim të çështjes penale në ngarkim të ish-kreut të Bashkisë Kukës, Safet Gjici si dhe Alma Kaçit, të dy të akuzuar për korrupsion pas verifikimit të rrethanave të konstatuara në një videoregjistrim që qarkulloi në internet ku dy të pandehurit shfaqeshin duke kryer marrëdhënie sekusale në zyrën e kryetarit.
“Në përfundim të hetimeve paraprake të këtij procedimi penal, janë përftuar prova dhe të dhëna nga analizimi i të cilave ka rezultuar se e pandehura Alma Kaçi, është personi që i ka ofruar/dhënë përfitime të parregullta të pandehurit Safet Gjici, me detyrë Kryetar i Bashkisë Kukës dhe se ky i fundit pasi ka përfituar prej saj përfitimin e parregullt, në formën e favorit seksual, ka premtuar/pranuar ta ndihmojë me projektin e saj të mbrojtjes së qenve dhe ta paraqiste më tej në mbledhje të Këshillit Bashkiak të Bashkisë Kukës”, citohet në njoftimin e SPAK që e akuzon Gjicin për “korrupsion pasiv…”.
Aktualisht, Gjici gjendet nën masën e sigurimit “arrest në burg” ndërsa e pandehura tjetër në “arrest shtëpie”.
Safet Gjici u arrestua më 24 qershor, pas publikimit të videos ku ai shfaqej duke kryer marrdhënie seksuale me një grua dhe më pas duke u kërkuar vartësve të kujdeseshin për të kaluar në këshill një projekt të kërkuar prej saj për menaxhimin e qenve të rrugës.
Safet Gjici njoftoi dorëheqjen pas publikimit të kësaj situate, ndërkohë që Këshilli Ministrave vendosi shkarkimin e menjëhershëm të tij nga detyra. Gjici i fitoi zgjedhjet lokale të majit dhe mori mandatin e dytë në Kukës. Mandatin e parë ai e mori në zgjedhjet pa garë të vitit 2019.
Ai është kryebashkiaku i dytë socialist që dorëhiqet pas një ngjarje të ngjashme. Pasi u arrestua në maj të vitit 2016, ish-kryebashkiaku i Dibrës, Shukri Xhelili u dënua me 1 vit e 8 muaj burg, përfshi kohën e paraburgimit, për akuzën e “marrëdhënies seksuale duke shpërdoruar detyrën”. Xhelili u arrestua pas transmetimit të një video regjistrimi ku ai shfaqej duke i ofruar një vend pune një vajze në këmbim të favoreve seksuale.
