Sandra Mitchell, ish-zyrtare e OSBE-së në vitet 1998-1999 në Kosovë dhe dëshmitarja e 38-të në gjyqin për krime lufte dhe krime kundër njerëzimit të Hashim Thaçit dhe tre të akuzuarve të tjerë bashkë me të në Dhomat e Specializuara të Kosovës në Hagë, i tha gjykatës se pas luftës, shumë incidente, kryesisht kundër serbëve etnikë dhe pronave të tyre, u bënë nga persona të veshur me shenja të UÇK-së.
UÇK-ja ishte e vetëdijshme se ekzistonin “elementë të këqij” të pakontrollueshëm, tha Mitchell në gjykatë, duke shpjeguar se Thaçi ishte informuar në disa raste kur edhe ajo kishte qenë e pranishme në takime. Megjithatë ai kishte pohuar se uniforma e UÇK-së po përdorej nga individë të tjerë.
Të enjten, duke iu përgjigjur avokatit të Thaçit, Gregory Kehoe, Mitchell konfirmoi deklaratat nga një raport i Misionit Verifikues në Kosovë se individë që nuk kanë lidhje me UÇK-në do ta përdornin uniformën e saj për hakmarrje personale dhe/ose rrëmbim.
Për më tepër, Ushtria Jugosllave kishte vazhduar të shënjestronte personat e lidhur me UÇK-në ose zonat që kontrolloheshin nga UÇK-ja, duke u përpjekur të fshihte vrasjet ose duke u përpjekur t’ia kalonte fajin UÇK-së.
Mitchell konfirmoi gjithashtu kur u pyet nga Kehoe se kur “operacionet kryheshin nga serbët dhe i atribuoheshin palës tjetër, dhe popullsia civile ishte e armatosur, ata i paguanin këta bashkëpunëtorë për informacione”.
Të mërkurën, Kehoe iu referua edhe masakrës “Panda Cafe”, ku gjashtë serbë etnikë u vranë në një kafene në Pejë, të cilën një raport i OSBE-së e raportoi si një akt hakmarrjeje nga shqiptarët etnikë për vrasjen e dhjetëra anëtarëve të UÇK-së.
Kehoe citoi një artikull të BIRN nga dhjetori 2018, në të cilin ish-prokurori i Serbisë për krimet e luftës, Vladimir Vukceviç, tha se nuk kishte “pothuajse asnjë shqiptar” në rajonin e Pejës në kohën e sulmit. “Ne arritëm në përfundimin se shqiptarët nuk janë autorët”, i kishte thënë Vukceviç BIRN-it. Megjithatë, ai shtoi se prokuroria e krimeve të luftës nuk e hetoi rastin, pasi ishte jashtë juridiksionit të saj.
Mitchell, e cila kishte punuar në shkrimin e raportit, i konfirmoi Kehoe se nëse informacioni në artikull është i vërtetë, atëherë përfundimi i raportit nuk ishte i saktë.
Të martën, gjatë marrjes në pyetje nga prokurorja Deborah Mayer, Mitchell kishte thënë se “përfshirja e UÇK-së në qershor ishte e qartë. Çdo raport i keqtrajtimit nga 19 qershori deri më 1 korrik pretendonte se autorët ishin nga UÇK-ja”.
Të mërkurën, ajo i tha gjykatës se ndërsa ishte në Kosovë “para ndërhyrjes së NATO-s dhe pas saj”, shqiptarët e Kosovës që ishin miq apo fqinjë që ishin pjesë e komuniteteve të pakicave etnike “konsideroheshin si bashkëpunëtorë dhe ishin në shënjestër të UÇK-së dhe mbështetësve të tyre në atë kohë”.
Thaçi, Kadri Veseli, Rexhep Selimi dhe Jakup Krasniqi akuzohen se kanë përgjegjësi individuale dhe komanduese për krimet e kryera ndaj të burgosurve të mbajtur në burgjet e UÇK-së në Kosovë dhe Shqipërinë fqinje, përfshirë 102 vrasje.
Krimet dyshohet se u kryen midis të paktën marsit 1998 dhe shtatorit 1999, gjatë dhe menjëherë pas luftës me forcat serbe. Të pandehurit janë vetëdeklaruar të pafajshëm për të gjitha akuzat.
