Interpoli ka nxjerrë një urdhër arresti për biznesmenin dhe politikanin serb të Kosovës Milan Radoiçiq dhe 18 të tjerë për përfshirjen e tyre të mundshme në sulmin në Banjska ndaj Policisë së Kosovës më 24 shtator, ku mbeti i vrarë një polic, konfirmuan për BIRN burimet e Policisë së Kosovës.
BIRN ka mësuar nga këto burime se lista e urdhërarrestit bazohet në listën e personave në kërkim të Gjykatës Themelore të Prishtinës për këtë rast.
Një oficer i Policisë së Kosovës, Afrim Bunjaku, u vra në sulmin e 24 shtatorit në Banjskë nga një bandë serbe e armatosur rëndë.
Ngjarja ringjalli tensionet me Serbinë. Autoritetet e Kosovës kanë akuzuar Serbinë për përfshirje të drejtpërdrejtë në këtë operacion. Në operacionin policor në Banjskë humbën jetën edhe tre persona të armatosur serbë.
Më 29 shtator, Radoiçiqi mori përsipër përgjegjësinë për sulmin në një deklaratë me shkrim të lexuar për mediat nga përfaqësuesi i tij ligjor Goran Petonijevic.
Në këtë deklaratë, ai pretendoi se e kishte planifikuar operacionin pa mbështetjen e Beogradit. Ai dha dorëheqjen gjithashtu si nënkryetar i partisë kryesore politike serbe të Kosovës, Lista Serbe.
Radoiçiqi fillimisht u identifikua se ishte i pranishëm në Banjskë me disa burra të armatosur në një video të publikuar nga Ministri i Brendshëm i Kosovës, Xhelal Svecla, tre ditë pas sulmit.
Gjashtë ditë pas sulmit, Svecla publikoi një video tjetër, duke treguar vilën e shtrenjtë të Radoiçiqit pranë liqenit të Ujmanit në Kosovë.
Prokuroria ka konfirmuar se dy makina dhe pasuri të tjera u konfiskuan nga pronat e Radoiçiqit. Gjithashtu thuhet se në gjykatë do të paraqitet një kërkesë për konfiskimin e vilës buzë liqenit, një apartamenti dhe një dyqani.
Autoritetet e Kosovës i kanë bërë thirrje Serbisë që të ekstradojë Radoiçiqin në mënyrë që ai të përballet me akuzat për përfshirjen e tij në sulm. Deri më tani, Radoiçiqi është marrë në pyetje nga prokurorët serbë dhe është urdhëruar nga gjykata që të mos largohet nga vendbanimi i tij. Atij iu konfiskua gjithashtu edhe pasaporta.
Serbia konteston pavarësinë e Kosovës dhe kështu ka kundërshtuar kërkesën e Kosovës për t’u anëtarësuar në Interpol. Ajo tha se marrëdhënia e ish-krahinës së Serbisë me Interpolin duhet të vazhdojë të ruhet përmes misionit të OKB-së në Kosovë, UNMIK. Një aplikim për t’iu bashkuar kësaj organizate dështoi në vitin 2018 kur Kosova nuk mori votat e mjaftueshme nga shtetet anëtare të organizatës. Në vitin 2017 dhe 2019 Kosova e tërhoqi aplikimin.
