Këshilli i Lartë i Prokurorisë nisi të enjten procedurat e përzgjedhjes së kandidaturave për tre vendet vakante në Prokurorinë e Posaçme, institucionit të ngritur me reformën në drejtësi për të luftuar korrupsionin dhe krimin e organizuar.
Ambasada e SHBA bëri të ditur në një status në rrjetin social X se po ndjek nga afër intervistat dhe vlerësimet e KLP-së për kandidatët.
“Shtetet e Bashkuara presin që ky proces vendimtar të rezultojë në përzgjedhjen e atyre prokurorëve më të kualifikuar me nivelet më të larta të guximit, profesionalizmit, integritetit dhe pavarësisë”- shkruan kjo ambasadë.
Ndërsa BE kërkon që përzgjedhja e emrave të rinj, “duhet të kontribuojë në forcimin e punës së SPAK-ut, integritetit dhe pavarësisë së tij”. “Ky institucion kyç duhet të mbështetet në profesionistët më të mirë në dispozicion për të përmbushur misionin e tij thelbësor,” apeloi delegacioni i BE-së.
Të enjten, Këshilli i Lartë i Prokurorisë zhvilloi intervista me tetë kandidatët për prokurorë të SPAK. Në garë për tre vendet vakante janë Albert Kuliçaj, Anita Jella, Bledar Maksuti, Kreshnik Ajazi, Ndini Tavani, Olsi Dado, Pali Deçolli dhe Sonila Muhametaj.
Zgjedhjet për kreun e SPAK-ut një vit më parë shkaktuan një kaos deklaratash politike në Tiranë, ku u përfshi ish-ambasadorja amerikane, Yuri Kim dhe qeveria – një garë që u fitua më pas nga Altin Dumani.
