Prokuroria e Posaçme kundër Korrupsionit dhe Krimit të Organizuar, SPAK njoftoi të premten më 8 dhjetor përfundimin e hetimeve dhe dërgimin për gjykim të çështje në ngarkim të ish-kryetarit socialist të ish-komunës Frakull në Fier, Viktor Çervanaku dhe 10 personave të tjerë, të akuzuar për trafikimin nga Kolumbia të 485.5 kg kokainë.
Sipas SPAK, lënda narkotike është transportuar dhe është fshehur gjatë transportit nëpërmjet një ngarkese me pleh organik artificial, e paketuar dhe ngarkuar në një kontenier, që është transportuar nga Kolumbia nëpërmjet Portit të Pireut, në Greqi, në drejtim të Portit të Barit, në Malin e Zi. Nëpërmjet transportit në rrugë tokësore ngarkesa është futur në Shqipëri më 19 shtator 2022 dhe pasi është zhdoganuar në Doganën e Tiranës, është transportuar në fshatin Frakull e Madhe në Fier, ku dhe është kryer sekuestrimi.
Kokaina ka qënë e përzier me “plehun organik” artificial dhe pas mbërritjes së saj në destinacion, organizatorët e trafikut do të gjenin dhe siguronin personat e specializuar që do të mundësonin ekstraktimin e kokainës së pastër, e cila më pas do të tregtohej. Sipas ekspertimit kimik të kryer nga Instituti i Policisë Shkencore ka rezultuar se nga procesi ekstraktimit do të përfitohej një sasi prej 485.5 kokainë.
Në njoftim sqarohet se hetimet paraprake janë kryer në bashkëpunim me autoritetet e drejtësisë së Malit të Zi dhe në koordinim me disa agjensi të tjera të huaja të zbatimit të ligjit.
“Nga hetimet e kryera është provuar fakti se personat e akuzuar në këtë procedim penal, në bashkëpunim me njëri tjetrin, në formën e grupit të strukturuar kriminal, kanë planifikuar, organizuar dhe importuar nga Kolumbia për në Shqipëri një sasi lënde narkotike të lloji kokainë”, thuhet në njoftim.
Të pandehurit Viktor Çervanaku, Nikolin Gjolena, Klajdi Vrioni (alias Klajdi Kodra) dhe Denilson Çervanaku, akuzohen nga prokuroria se janë personat që kanë krijuar, organizuar dhe kanë drejtuar grupin kriminal. Ndaj tyre rëndojnë veprat penale “Trafikimi i narkotikëve”, “Grupi i strukturuar kriminal” dhe“Kryerja e veprave penale nga organizata kriminale ose grupi i strukturuar kriminal”.
Të pandehurit Zenel Çervanku, Enxhi Ferhati, Redion Meshi, Julian Malaj, Bledar Matoshi, Marildo Rona dhe shetasi kolumbian, Samir Rosales Rodriguez akuzohen si pjesëmarrës në këtë grup kriminal.
Ndërkohë, Viktor Çervanaku, Denilson Çervanaku, Redion Meshi dhe Klajdi Vrioni akuzohen edhe për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Për shtetasin Kid Koshena, i hetuar për veprën penale “Mbajtja pa leje dhe prodhimi i armëve, armëve shpërthyese dhe i municionit”, nuk është arritur të vërtetohet përgjegjësia penale dhe për rrjedhojë prokuroria ka paraqitur në gjykatë kërkesë për pushimin e hetimeve ndaj tij.
